ახალი წელი ლამაზად მორთულ ნაძვის ხესთან, საჩუქრებთან, სიახლეებთან და გემრიელ კერძებთან ასოცირდება. ამ დღესასწაულზე ინციდენტები, წესით, ნაირ-ნაირი საჭმლის ჭამით ატკიებული კუჭითა და დილით საცივის თეფშში გაღვიძებით უნდა შემოიფარგლებოდეს, თუმცა საქმე ასე მარტივად როდია?!

დეკემბრის შუა რიცხვებიდან იანვრის შუა რიცხვებამდე ადამიანები იმ საფრთხის წინაშე ვდგებით, რომელსაც დიდი ხანია ვიცნობთ, მაგრამ მაინც ვერ ვეგუებით: ქუჩებს "ხლაპუშკიანი" ბავშვები ეპატრონებიან. სულერთია, რას წარმოადგენთ, რა შეგიქმნიათ და რა შეგიძლიათ — "ხლაპუშკიანი" ბავშვების რისხვასა და კივილით სირბილს ვერ გადაურჩებით.

"ხლაპუშკების" გამოყენება, რა თქმა უნდა, ძალიან საშიშია. წლების განმავლობაში არაერთი შემთხვევა ყოფილა, როდესაც საახალწლო ასაფეთქებლების გამოყენებით ბავშვებმა და მოზრდილებმა ჯანმრთელობის დაზიანება მიიღეს. სწორედ ამიტომ უმჯობესია, ერთმანეთისა და ცხოველების დასაცავად მსგავსი ტიპის გასართობისგან თავი შევიკავოთ.

მიუხედავად იმისა, რომ "ხლაპუშკების" გამოყენება არც ისეთი უწყინარი რამაა, როგორც სხვებს ჰგონიათ, გადავწყვიტეთ ამჯერად ურჩი "ხლაპუშკიანი" ბავშვებისგან თავის დასაცავად აუცილებელი და სახალისო გზები მაინც შემოგთავაზოთ. თუმცა ისიც უნდა აღვნიშნოთ, რომ ჩამოთვლილი ხერხების ეფექტურობაში თავადაც არ ვართ დარწმუნებულები:

1. აუხსენით ბავშვებს, რომ "ხლაპუშკები" ადამიანებსა და ცხოველებს საფრთხეს უქმნის და საშინელი ხმაც აქვს

თუ ბავშვს "ხლაპუშკების" გამოყენების საშიშროებაზე მშვიდად დაელაპარაკებით, ის აუცილებლად დაგიჯერებთ და სამყაროში მშვიდობა დაისადგურებს.

არ გამოგადგათ ეს ხერხი, ჰო? ეგრეც ვიფიქრეთ.

2. სახლიდან გასვლამდე გარემო დაზვერეთ

გარემო კარგად დაზვერეთ და ქუჩაში მხოლოდ მას შემდეგ გადით, რაც დარწმუნდებით, რომ 100 მეტრის რადიუსში "ხლაპუშკიანი" ბავშვები ჩასაფრებულები არ არიან.

3. გააფრთხილეთ, რომ გარეთ გამოდიხართ

თუ ახლომახლო "ხლაპუშკიან" ბავშვს დაინახავთ, ხმამაღლა დაიყვირეთ, რომ ცოტა ხნით აფეთქებები შეწყვიტონ, რათა სამსახურამდე მისვლა მოახერხოთ. ხელები ასწიეთ, ზავის ნიშნად თეთრი დროშა ააფრიალეთ და მშობლებთან დაბეზღებით დამუქრება არც კი გაბედოთ — კარგად არ დასრულდება.

4. ბავშვები ტკბილეულით მოისყიდეთ

როგორც კი გარეთ გახვალთ, ერთი ხელით თეთრი დროშა აფრიალეთ, მეორეთი კი ჩანთიდან ტკბილეული ამოიღეთ, რათა ბავშვებს ცოტა ხნით მაინც დაავიწყდეთ "ხლაპუშკა". როგორც კი აფეთქებებს შეწყვეტენ, ტკბილეული მიმოფანტეთ და თავს უშველეთ.

5. ივარჯიშეთ სირბილსა და ხტომაში

შესაძლოა, "ხლაპუშკებით" დანაღმული ქუჩების გავლაში თქვენი ერთადერთი იმედი თქვენივე ფიზიკური მონაცემები აღმოჩნდეს.

6. კაპიტანი ამერიკასგან ფარი ითხოვეთ

ამ პრობლემის წინააღმდეგ ჩვეულებრივი მოკვდები შესაძლოა, ვერაფერს გავხდეთ, ამიტომ სუპერგმირებს უნდა მივმართოთ. იქნებ, კაპიტანმა ამერიკამ დროებით ფარი გვათხოვოს, თუ თავადაც ამერიკელ "ხლაპუშკიან" ბავშვებს არ ემალება.

7. შეიძინეთ ჯავშანჟილეტი ტონი სტარკისგან

თუ კაპიტანი ამერიკა არ გამოგეხმაურათ, ჯავშანჟილეტის შეძენას გირჩევთ. თუმცა ამ საფრთხეს, ალბათ, ტონი სტარკის რკინის კაცის კოსტიუმიც ვერ გაუმკლავდება...

8. მიწისქვეშა გვირაბებით იმოგზაურეთ

საახალწლოდ მიწაზე სიარული არც ისე კარგი აზრია, ამიტომ ერთი დიდი ნიჩაბი იყიდეთ და სამსახურამდე საკუთარი გვირაბი გათხარეთ.

9. ილოცეთ

მიმართეთ ყველას, ვისიც გწამთ — ნებისმიერი სახის დახმარება დაგჭირდებათ!

10. სახლიდან ნუ გამოხვალთ

შესაძლოა, საუკეთესო გამოსავალი 1 თვის განმავლობაში სახლში გამოკეტვა იყოს, თუმცა ვინ იცის, გაუძლებს თუ არა "ხლაპუშკიანი" ბავშვების რისხვას თქვენი სახლის კედლები?!