პარტია საქართველოსთვის წევრის, ნათია მეზვრიშვილის აზრით, ენმ-ს თავმჯდომარის, ნიკა მელიას დაანონსებული მასობრივი შიმშილობა შედეგს ვერ გამოიღებს, მითუმეტეს, იმის ფონზე, რომ მოთხოვნა ექსპრეზიდენტის გათავისუფლებაა. მისივე თქმით, პროტესტის ეს ფორმა ქვეყანაში არსებულ სხვა პრობლემებს რომ ეხებოდეს, მათ "ვერავინ დაასწრებდა" და შიმშლობის აქციას თავადაც შეურთდებოდნენ.

"მე არ მგონია, რომ ეს შიმშილობა, მითუმეტეს მიხეილ სააკაშილის გათავისუფლების მოთხოვნით რამე შედეგს გამოიღებს. თუმცა კიდევ ერთხელ ვიტყვი, არ მგონია, რომ ეს რამე ფორმით, ოცნებას რამე ნაბიჯებს გადაადგმევინებს, მითუმეტეს მიხეილ სააკაშილის გათვისუფლებას აიძულებს.

გარდა ამისა, ჩვენ ისეთი პრობლემები გვიდევს მაგიდაზე, თუ ამას საერთოდ მოლაპარაკების მაგიდას დავარქმევთ, ეს რომ იყოს აქცია მართლმსაჯულების რეალური დამოუკიდებლობისთვის, შესაბამისი საარჩევნო სისტემის ფორმირებისთვის ქვეყანაში, ძალაუფლების გადანაწილებისთვის, კონსიტუციურ მოწყობასთან დაკავშირებით, ანუ ის პრობლემები, რაც არის, საიდანაც სათავეს იღებს აბსოლუტურად ყველა პრობლემა ქვეყანაში, ჩვენ ალბათ ვერავინ დაგვასწრებდა", — თქვა მან ფორმულას ეთერში.

დღეს, 21 დეკემბერს პარლამენტთან მიმდინარე აქციაზე მელიამ ექსპრეზიდენტ მიხეილ სააკაშვილის გათავისუფლების მოთხოვნით უვადო, მასობრივი შიმშილობა დააანონსა. მელია ამბობს, რომ ამ გადაწყვეტილებას დაახლოებით 2 კვირის განმავლობაში განიხილავდა და ექსპრეზიდენტმა სააკაშვილმა არ იცოდა.

მისივე თქმით, მასობრივი საპროტესტო შიმშილობა დაიწყება კახეთის გზატკეცილზე, ერთიანი ნაციონალური მოძრაობის ოფისის მიმდებარე ტერიტორიაზე. მელია ამბობს, რომ შიმშლობის აქციაში 300-ზე მეტი ადამიანი მიიღებს მონაწილეობას.