7 წლის ბიჭი, რომელმაც და გადაარჩინა, ტომ ჰოლანდმა სპაიდერმენის გადასაღებ მოედანზე დაპატიჟა

7 წლის ბრიჯერ უოლკერის სახელი მსოფლიომ დაახლოებით 1 წლის წინ გაიგო, როდესაც ბიჭმა უმცროსი და ძაღლის თავდასხმისგან დაიცვა. მამაც ბიჭს პლასტიკური ოპერაცია დასჭირდა და 90 ნაკერი დაადეს, თუმცა მისმა საქციელმა მსოფლიო და სუპერგმირები აალაპარაკა.

კრის ევანსმა, რომელიც მარველის ფილმებში კაპიტანი ამერიკას როლს ასრულებს, ბიჭს კაპიტანის ფარი გაუგზავნა. ბრიჯერს რობერტ დაუნი (რკინის კაცი) და ტომ ჰოლანდიც (ადამიანი ობობა) გამოეხმაურნენ. ტომ ჰოლანდმა ბიჭს დაურეკა და სპაიდერმენის ახალი ფილმის გადასაღებ მოედანზე წაყვანას დაჰპირდა:

"სპაიდერმენი 3-ის გადაღებებს ვიწყებთ და თუ გენდომება გადასაღებ მოედანზე მოსვლა და ამ სუპერგმირის ფორმის ახლოს ნახვა, ყოველთვის გაგვიხარდება შენი ხილვა", — შესთავაზა ჰოლანდმა ბიჭს.

როგორც ჩანს, ტომს საკუთარი პირობა არ დავიწყებია: ბრიჯერმა გადასაღები მოედანი დაათვალიერა და კედლებზე მცოცავ გმირთან ერთადაც იფრინა!

View this post on Instagram

A post shared by Robert Walker, JD (@robertwalker307)

ფილმის გუნდს ბრიჯერის მამამ მადლობა გადაუხადა:

"სპაიდერმენის ფილმის შეფასებები ძალიან მოგვეწონა. იმის მიუხედავად, რომ უამრავი მიზეზია, რის გამოც ის ერთ-ერთ საუკეთესო ფილმად შეგვიძლია მივიჩნიოთ, მე მგონია, რომ ამის მთავარი მიზეზი კარგი, კეთილი და საკუთარ საქმეზე შეყვარებული მსახიობები და გუნდია. ეს ის ადამიანები არიან, რომლებმაც პატარა ბიჭის ამბავი გაიგეს და უნდოდათ, მისთვის მადლობა გადაეხადათ. ეს ის ადამიანები არიან, რომლებმაც გადაღებების დატვირთული პროცესი შეაჩერეს იმისთვის, რომ პატარა ბიჭი გაეღიმებინათ და საყვარელ გმირთან ერთად ფრენის საშუალება მიეცათ", — წერს ბრიჯერის მამა ინსტაგრამზე.

ბრიჯერის ისტორია მთელ მსოფლიოს მისმა დეიდამ, ნიკოლ უოლკერმა მოუთხრო ინსტაგრამზე გამოქვეყნებული პოსტით, თუ როგორ გადაარჩინა მან თავისი უმცროსი და:

"მას შემდეგაც კი, რაც ძაღლმა მას სახეზე არაერთხელ უკბინა, თავის დას ხელი ჩაავლო და გაიქცა, რათა უსაფრთხო ადგილას გაეყვანა. მოგვიანებით გვითხრა: "თუ ვინმე უნდა მომკვდარიყო, ვფიქრობ, ეს მე უნდა ვყოფილიყავი". პლასტიკური ოპერაციის შემდეგ მას სახეზე 90 ნაკერი დაადეს და ახლა სახლში გადის რეაბილიტაციას. ჩვენ ძალიან გვიყვარს ჩვენი მამაცი ბიჭი და გვინდა, სხვა სუპერგმირებმაც იცოდნენ მის შესახებ", — ვკითხულობთ პოსტში.

სწორედ ამის შემდეგ გამოეხმაურა ამ ფაქტს არაერთი ცნობილი ადამიანი, მათ შორის კრის ევანსი, რომელმაც განსაკუთრებულ სიურპრიზთან ერთად 6 წლის გმირი დაამშვიდა, რომ მალე ყველაფერი უკეთ იქნება:

"სულ ასეთი მამაცი იყავი, შენნაირი ადამიანები გვჭირდება. ვიცი, რომ გამოჯანმრთელების პროცესი შეიძლება რთული იყოს, მაგრამ მას შემდეგ, რაც შენზე გავიგე, ვფიქრობ, ეს სულაც არ გაგიჭირდება".

ამავე თემაზე:

ბოლო ამბები:

გირჩევთ