სატრანსპორტო მიმართულებით სტარტაპების განვითარების ხელშეწყობისთვის კომპანია Future Laboratory-მ მასშტაბური პროექტი დაიწყო. პროგრამა საავტომობილო ინოვაციებზე მომუშავე სტარტაპებს გააერთიანებს და მისცემს შანსს, საკუთარი იდეა რეალურ ბიზნესად აქციონ.

პროექტის ფარგლებში ინოვაციური იდეის მქონე გუნდებს შესაძლებლობა ექნებათ, მონაწილეობა მიიღონ 3-თვიან სააქსელერაციო პროგრამაში. ამისათვის მნიშვნელოვანია, მათ ჰქონდეთ სურვილი, განავითარონ პროექტები ჭკვიანი და ეკოლოგიური ტრანსპორტის, სატრანსპორტო უსაფრთხოების, გადაზიდვების, ერთობლივი გამოყენების ტრანსპორტის, დრონების და სხვა მსგავსი მიმართულებით.

"სტარტაპ აქსელერაციის პროექტისთვის ავტომიმართულება ახალია, თუმცა ეს სფერო საკმაოდ ინოვატორულია. ამ მიმართულებით ქვეყანაში ბევრი სტარტაპი ფუნქციონირებს და ვიმედოვნებ, რომ დაინტერესება მაღალი იქნება. ეს პროექტი რეალურად არის შანსი სტარტაპებისთვის, რომ საკუთარი იდეა აქციონ რეალობად და დაიწყონ საოცნებო ბიზნესი", — ირაკლი ქაშიბაძე, Future Laboratory-ს დამფუძნებელი.

აქსელერაციის ფარგლებში პირველ ეტაპზე შერჩეული სტარტაპები პროტოტიპის შესაქმნელად 5000-ლარიან ინვესტიციას მიიღებენ. გამარჯვებული სტარტაპებისთვის საპრიზო ფონდი 200 000 ლარია. პროექტში მონაწილეობისათვის რეგისტრაცია უკვე დაიწყო.

სტარტაპ სააქსელერაციო პროგრამის პარტნიორი და გენერალური სპონსორი ავტოინდუსტრიის ლიდერი თეგეტა ჯგუფია.

პროგრამის ფარგლებში სტარტაპებს შეეძლებათ, საქართველოს ინოვაციებისა და ტექნოლოგიების სააგენტოს ფაბლაბის ინფრასტრუქტურით ისარგებლონ. სტარტაპებს ექნებათ თეგეტა ჯგუფის სპეციალისტებთან კომუნიკაციის შესაძლებლობა და წვდომა გარკვეულ ტექნიკურ და საზომ აპარატურასთან. დამატებით ისინი შეძლებენ საექსპერტო რჩევები მიიღონ საერთაშორისო და ადგილობრივი მენტორებისგან და დარგის სპეციალისტებისგან.