მას შემდეგ, რაც ვენეციის კომისიის დასკვნა, რომელიც საკონსტიტუციო სასამართლოს შესახებ კანონში ცვლილებებს ეხება, გასაჯაროვდა, ოპოზიცია პრეზიდენტს მოუწოდებს აღნიშნულ კანონს ვეტო დაადოს.

თავისუფალი დემოკრატების წევრის, ზურაბ აბაშიძის განმარტებით, არასწორია უმრავლესობის მიერ იმის დაანონსება, რომ ისინი პრეზიდენტის ვეტოსაც კი დაძლევენ:

"ვიმედოვნებ, რომ შენიშვნებს, რომელსაც გამოაგზავნის პრეზიდენტი, ხელისუფლება ამაზე დაფიქრდება და მიიღებს სწორ, რელევანტურ გადაწყვეტილებას".

რესპუბლიკელების წევრის, დავით ზურაბიშვილის განმარტებით, საკონსტიტუციო სასამართლოს შესახებ კანონში პარლამენტის მიერ შეტანილი ცვლილებები არა ამ კანონის უფრო მეტად დახვეწას, არამედ გადაწყვეტილებების სწრაფად მიღების მიზანს ემსახურება:

"პოლიტიკური მოტივაციის მომენტია, რომ რაღაცნაირად გადაწყვეტილებები უფრო სწრაფად იქნეს მიღებული. აქედან გამომდინარე, სრულიად ბუნებრივად მეჩვენება, რომ ასეთი შენიშვნებით დაბრუნდა ეს კანონი".