ქართული ოცნების გენერალური მდივანი, კახა კალაძე ამტკიცებს, რომ მისთვის გაუგებარია რატომ ჩათვალა საქართველოში აშშ-ს ყოფილმა ელჩმა, იან კელიმ აშშ-ის სახელმწიფო მდივნის თანაშემწის მოადგილის, ერიკა ოლსონზე მისი განცხადება შეურაცხმყოფელად. ის განმარტავს, რომ "მისი პრობლემა იყო" რომ არ იცოდა ასეთი თანამდებობის არსებობის შესახებ.

"გაუგებარია იან კელის განცხადება, იმიტომ, რომ დავიწყოთ იქედან, რომ მე შეურაცხყოფა არავისთვის არ მიმიყენებია. თქვენ ვერ ნახავთ ვერცერთ ჩემ განცხადებას მე ჩვენი სტრატეგიული პარტნიორის წარმომადგენლისთვის, ან ზოგადად, უცხოელი ჩვენი მეგობრისთვის შეურაცხყოფა მიმეყენებინოს. არ არსებობს ასეთი ფაქტი და გუშინდელი ჩემი განცხადებაც არანაირი შეურაცხყოფა არ იყო. ეს უბრალოდ ჩემი პრობლემა იყო, რომ თანამდებობის ნაწილში, რომელიც ითქვა ჟურნალისტის მხრიდან — მრჩევლის მოადგილე, რომ მე არ ვიცოდი, თორემ შეურაცხყოფა მე არავისთვის არ მიმიყენებია", — განაცხადა კალაძემ.

"თანაშემწის მოადგილე რა უბედურებაა?" — ასე უპასუხამ კალაძე ოლსონის კრიტიკული განცხადების შესახებ დასმულ კითხვას. მას შემდეგ, რაც განუმარტეს, რომ ოლსონი სახელმწიფო დეპარტამენტის მაღალჩინოსანია, კალაძემ განაცხადა:

"თანაშემწე და იმის მოადგილე კიდე? არ ვიცოდი ეგეთი თანამდებობა თუ იყო".

კალაძის განცხადებას გამოეხმაურა იან კელი, რომელმაც ტვიტერის ოფიციალურ გვერდზე დაწერა:

"საგარეო პოლიტიკის კეთება შეურაცხყოფით. ვფიქრობ, თვით კისინჯერიც კი ვერ მოიფიქრებდა ამას".

აღსანიშნავია, რომ ბოლო პერიოდში ქართული ოცნების ლიდერები არაერთი განცხადება გააკეთეს, სადაც ღიად აკრიტიკებენ, მათ შორის შეურაცხმყოფელ კონტექსტში მოიხსენიებენ ქვეყნის საერთაშორისო პარტნიორებს. ხელისუფლების წევრები ხშირად ამბობენ, რომ არავითარი მნიშვნელობა არ აქვს რას ამბობს "ვიღაც ევროპარლამენტარი ბრძნული სახით". მმართველი პარტიის ლიდერები იმ საერთაშორისო პარტნიორებს, რომლებიც ქართულ ოცნებას აკრიტიკებენ, ნაციონალური მოძრაობის მეგობართა კლუბის წევრებს უწოდებენ და ამტკიცებენ, რომ ისინი კრიტიკული შეფასებების სანაცვლოდ "ფულს იღებენ".

აღსანიშნავია, რომ დასავლელი პარტნიორებისგან ხმაურიანი განცხადებები გამოიწვია თავად კალაძის მიმართვამ ესტონეთის პრეზიდენტის, კერსტი კალიულაიდისადმი. უკრაინული გამოცემისთვის მიცემულ ინტერვიუში კალიულაიდმა თქვა, რომ უკრაინა, მოლდოვა და საქართველო ევროკავშირის წევრობისთვის ჯერ მზად არ არიან, რის საპასუხოდაც კალაძემ განაცხადა რომ ყველამ თავის ქვეყანას უნდა მიხედოს. კითხვას, აფუჭებს თუ არა ასეთი განცხადებები ესტონეთთან ურთიერთობებს, ასე უპასუხა:

"ჰკითხეთ ესტონეთის პრეზიდენტს, აფუჭებს თუ არა. აუცილებლად დაუსვით ეს შეკითხვა ესტონეთის პრეზიდენტს".