საქართველოს ფინანსთა სამინისტროს საგამოძიებო სამსახურის ცნობით, ყალბი საგადასახადო დოკუმენტების დამზადება-გამოყენების, სახელმწიფო ბიუჯეტის დიდი ოდენობით ქონებრივი დაზიანებისა და დიდი ოდენობით ქონების გადამალვის საქმეზე სამი ადამიანი დააკავეს.

კერძოდ, მათი განცხადებით, ბრალდებულებმა, უკანონო მატერიალური სარგებლის მიღების მიზნით, მათი მართვის ქვეშ მყოფი ერთ-ერთი კომპანიის სახელით, 2016-2018 წლებში საგადასახადო ორგანოში დაზუსტებული დამატებული ღირებულების გადასახადის დეკლარაციები წარადგინეს, რომელშიც ყალბი მონაცემები დააფიქსირეს. მათი თქმით, ამით ბრალდებულებმა ჯამში 2 209 207 ლარის ოდენობით ფიქტიური აქტივი შექმნეს, რომელიც შემდეგ ბიუჯეტის მიმართ არსებული საგადასახადო ვალდებულებების დასაფარად გამოიყენეს.

"გამოძიებით ასევე დადგენილია, რომ ბრალდებულებმა, მოსალოდნელი ქონებრივი ვალდებულებისგან თავის არიდების მიზნით, მათი მართვის ქვეშ მყოფი კომპანიის სახელზე არსებული 3 103 197 ლარის ღირებულების უძრავი და მოძრავი ქონება, თვალთმაქცური გარიგებებისა და ყალბი საგადასახადო ანგარიშ-ფაქტურების გამოწერის გზით, გადააფორმეს მათივე მართვის ქვეშ მყოფი სხვა კომპანიის სახელზე, რითაც სახელმწიფოს წაერთვა შესაძლებლობა აღნიშნული ქონების რეალიზაციით ამოეღო კომპანიის დავალიანება ბიუჯეტის მიმართ", — ვკითხულობთ განცხადებაში.

მათივე თქმით, აღნიშნული ოპერაციის შედეგად, გარიგებაში მონაწილე კომპანიამ 1 146 101 ლარის ოდენობის დამატებული ღირებულების გადასახადის ე.წ. ფიქტიური ჩათვლა მიიღო, საიდანაც 399 128 ლარი საბიუჯეტო გადასახადების დაფარვის მიზნით გამოიყენა.

საგამოძიებო სამსახურის ცნობით, გამოძიების პროცესში, ბიუჯეტზე მიყენებული ზიანის ამოღების უზრუნველსაყოფად, ბრალდებულების სახელზე რიცხული უძრავი და მოძრავი ქონება, ასევე საბანკო ანგარიშები დააყადაღეს. გამოძიება სისხლის სამართლის კოდექსის 210-ე მუხლის მეორე ნაწილით, ასევე, 185-ე და 205-ე პრიმა მუხლების მეორე და მესამე ნაწილებით მიმდინარეობს, რაც სასჯელის სახით თავისუფლების აღკვეთას 6-დან 9 წლამდე ვადით ითვალისწინებს.