უწყებათაშორის საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განცხადებით, ისინი ინტენსიურად მუშაობენ, რომ ღამის კლუბების ფუნქციონირება აღდგეს. მისი თქმით, ზოგიერთ ქვეყანაში კლუბები გახსნეს, მაგრამ აკრძალულია ცეკვა.

"მოგეხსენებათ, ჯანდაცვის სამინისტრო მიერ ინტენსიური მუშაობა მიმდინარეობს ამ სეგმენტთან, რომ ერთი მხრივ, სეგმენტს მიეცეს საშუალება ფუნქციონირების, მეორე მხრივ, მისი ფუნქციონირება მაქსიმალურად იყოს გადაზღვეული ეპიდემიოლოგიური თვალსაზრისით. ზოგიერთ ქვეყანაში ღამის კლუბი გახსნეს, ოღონდ აკრძალულია ცეკვა, რაოდენ სასაცილოც არ უნდა იყოს", — აცხადებს ის.

გუშინ ჯანდაცვის სამინისტროში შრომის ინსპექციისა და ღამის კლუბების წარმომადგენლების შეხვედრა გაიმართა. როგორც შრომის ინსპექციის სამსახურის უფროსმა, ბექა ფერაძემ განაცხადა, კლუბების ფუნქციონირების აღდგენის მიზნით, გარკვეული შეთანხმება უკვე შედგა და მას საკოორდინაციო საბჭოს წარუდგენენ. კერძოდ, მწვანე პასპორტის გარდა, მოთხოვნებს შორის იქნება შესაბამისი სავენტილაციო სისტემები, ადამიანების რაოდენობრივი შეზღუდვა და სხვა.

აღსანიშნავია, რომ მწვანე პასპორტების ამოქმედების მიუხედავად, კლუბების მუშაობა ჯერ დაშვებული არ არის. 4 დეკემბერს შრომის ინსპექციამ კლუბი ხიდი 10 000 ლარით დააჯარიმა და დალუქა. კლუბის წარმომადგენლებმა "ესკალაციის თავიდან აცილების მიზნით", ტერიტორია დატოვეს, თუმცა პასუხისმგებელ პირებს "გონივრულ ვადა" მისცეს, რათა მათი მუშაობა დაუშვან. მათი თქმით, სხვა შემთხვევაში, "მხოლოდ წინააღმდეგობას მიიღებენ".