დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, კორონავირუსის ახალი შტამი, ომიკრონი რაღაც პერიოდში საქართველოშიც შემოვა, რადგან ახალმა შტამმა "საზღვრები არ იცის". მისივე თქმით, ომიკრონს რეიფიცირების 3-ჯერ მეტი რისკი აქვს, თუმცა მისი კლინიკური მდგომარეობა რთული არაა.

"ამ ახალმა შტამებმა საზღვრები არ იცის. და ალბათ, რაღაც პერიოდის შემდეგ ის შემოვა, რამეთუ ის უკვე 40-ზე მეტ ქვეყანაში არის დაფიქსირებული [...] ომიკრონს პირველი გამოცდილება რაზეც მიუთითებს, აქვს დაახლოებით, სამჯერ მეტი რეინფიცირების [რისკი], წინასწარი ინფორმაცია არის და აკვირდებიან, რომ მისი კლინიკური მდგომარეობა რთული არ არის", — განაცხადა მან რუსთავი 2-თან.

პირველ დეკემბერს გამყრელიძემ განაცხადა, რომ კორონავირუსის ახალი შტამის, ომიკრონის ამოსაცნობად ქვეყანა სფეციფიკურ PCR ტესტებს მიიღებს. მისივე თქმით, სწრაფი ტესტი მას ვერ ამოიცნობს.

კორონავირუსის ახალი ვარიანტი, ომიკრონი სამხრეთ აფრიკაში 25 ნოემბერს დაფიქსირდა. ჯანდაცვის მსოფლიო ორგანიზაციამ ახალი შტამი შეშფოთების საგნად გამოაცხადა. ომიკრონის გამო ევროკავშირის ქვეყნებმა და ამერიკის შეერთხებულმა შტატებმა სამხრეთ აფრიკის ქვეყნებიდან ფრენები აკრძალეს. რეგულაციები დაწესდა საქართველოშიც. უწყებათაშორისი საკოორდინაციო საბჭოს გადაწყვეტილებით, 28 ნოემბრიდან 8 ქვეყნიდან შემოსულ მგზავრებს 14-დღიანი კარანტინის გავლა მოუწევთ.

30 ნოემბერს დაავადებათა კონტოროლის ეროვნული ცენტრის ხელმძღვანელის მოადგილემ, პაატა იმნაძემ განაცხადა, რომ კორონავირუსის ახალი შტამი საქართველოშიც შემოაღწევს, თუმცა მისი თქმით, დაახლოებით, ერთი თვე მაინც აქვთ, რათა ახალი ვარიანტი შეისწავლონ.