დაავადებთა კონტროლის ეროვნული ცენტრის დირექტორის მოადგილის, პაატა იმნაძის განცხადებით, კორონავირუსის ახალი შტამი, ომიკრონი საქართველოშიც შემოაღწევს, თუმცა მისი თქმით, დაახლოებით, ერთი თვე მაინც აქვთ, რათა ახალი ვარიანტი შეისწავლონ.

"პირბადე და ჯერჯერობით, მაინც ვიცით, რომ აცრა ამაზეც მუშაობს, რაც აფრიკიდან გაქვს ინფორმაცია და რა თქმა უნდა, შემოაღწევს ბოლო-ბოლო ჩვენთან, საქართველო მთვარეზე არ არის, დედამიწაზეა. მაგრამ ჩვენ ისეთი გამალებული ურთიერთობა სამხრეთ აფრიკიდან და დღეში რამდენიმე რეისი ნამდვილად არ გვაქვს, როგორც ევროპის ქვეყნებს სადაც უკვე გამოჩნდა უკვე ეს ვირუსი და ჩავიდა სამხრეთ აფრიკიდან. მე მგონი, დაახლოებით, ერთი თვე უნდა გვქონდეს მარაგში, რომ წინასწარ ვიცოდეთ, რასთან გვექნება საქმე", — აღნიშნა მან პალიტრანიუსის ეთერში.

კორონავირუსის ახალი ვარიანტი, ომიკრონი სამხრეთ აფრიკაში 25 ნოემბერს დაფიქსირდა. ჯანდაცვის მსოფლიო ორგანიზაციამ ახალი შტამი შეშფოთების საგნად გამოაცხადა. ომიკრონის გამო ევროკავშირის ქვეყნებმა და ამერიკის შეერთხებულმა შტატებმა სამხრეთ აფრიკის ქვეყნებიდან ფრენები აკრძალეს. რეგულაციები დაწესდა საქართველოშიც. უწყებათაშორისი საკოორდინაციო საბჭოს გადაწყვეტილებით, 28 ნოემბრიდან 8 ქვეყნიდან შემოსულ მგზავრებს 14-დღიანი კარანტინის გავლა მოუწევთ.

გაიგე მეტი: