კულტურის, სპორტისა და ახალგაზრდობის მინისტრის, თეა წულუკიანის განცხადებით, კარგი იქნება, თუ სპორტული ფედერაციები პირველი ქალი მინისტრის პირობებში "მუშტებზე ყურებას შეწყვეტენ". მისი თქმით, ქართულ სპორტს არ შეეფერება არჩევნებისას და სხვა სიტუაციებში სპორტსმენების ჩხუბი, თუმცა სხვა დროს, ტატამზე, ის მიესალმება ძალის გამოყენებას.

"ფედერაციები კარგი იქნება, თუ პირველი ქალი მინისტრის, სპორტის მინისტრის პირობებში მუშტებზე ყურებას შეწყვეტენ საქმიანი ურთიერთობისას, თორემ სხვა მხრივ, რა თქმა უნდა, როდესაც ეს სპორტისთვის აუცილებელია, ამას მხოლოდ, მაგალითად, ტატამზე მივესალმებით ძალის გამოყენებას და სხვის ჯობნას, ასევე, კრივში, მაგრამ არჩევნებისას და სხვა დროს კარგია თუ თავს შეიკავებენ სპორტსმენები ჩხუბისგან, იმიტომ რომ ეს პირველ რიგში ქართულ სპორტს არ შეეფერება" — განაცხადა მან.

ამასთანავე, მინისტრმა აღნიშნა, რომ მოჭიდავე ზურაბ დათუნაშვილს ფედერაციის ხელმძღვანელობასთან ჰქონდა პრობლემა და სწორედ ამიტომ, წყენის საფუძველზე მან ქვეყანა დატოვა. მისი თქმით, სამწუხაროა, რომ ის სხვა დროშის ქვეშ ასპარეზობს.

"მე ვიცი, რომ ამ სპორტსმენს ჰქონდა შესაბამის ფედერაციასთან, თუ ხელმძღვანელობასთან პრობლემა, რომელიც თუ სწორად ვიცი, მუშტი-კრივთან იყო დაკავშირებული და წყენის საფუძველზე, რომელიც ფედერაციიდან მომდინარეობდა, ბატონმა ზურამ დატოვა ქვეყანა და სხვა ქვეყნის დროშის ქვეშ ასპარეზობს ბატონი ზურაბ დათუნაშვილი, ეს სამწუხაროა", — ამბობს ის.

2019 წლის 11 იანვარს ბერძნულ-რომაულ ჭიდაობაში საქართველოს ჩემპიონატის ფინალის დროს ინციდენტი მოხდა. მოჭიდავე ზურაბ დათუნაშვილს ჭიდაობის ეროვნული ფედერაციის პრეზიდენტმა თამაზ (გეგა) გეგეშიძემ სახეში ბლაგვი საგანი და მუშტი ჩაარტყა.

გეგეშიძე დათუნაშვილის მიმართ განხორციელებული ძალადობის ბრალდებით 22 იანვარს, საღამოს დააკავეს. მოჭიდავეების ნაწილი ფედერაციის პრეზიდენტის დაკავებას აპროტესტებდა. ისინი გეგეშიძის გათავისუფლებას ითხოვდნენ და ამბობდნენ, რომ სპორტის სასახლეში მომხდარი დაპირისპირება ინციდენტი იყო, რომელიც ფედერაციაშივე უნდა დასრულებულიყო.

გეგეშიძის აღკვეთის ღონისძიებაზე სასამართლომ 24 იანვარს იმსჯელა. მან ციხე 5 000 ლარის ოდენობის გირაოს გადახდის შემდეგ დატოვა. გარდა ამისა, მან ჭიდაობის ფედერაციის პრეზიდენტის პოსტიც შეინარჩუნა.

ამ ინციდენტის შემდეგ დათუნაშვილი ამბობდა, რომ არჩევანის წინაშეა დაასრულოს კარიერა ან სხვა ქვეყნის სახელი იასპარეზოს. გარდა ამისა, სპორტსმენი აცხადებდა, რომ ჭიდაობის ფედერაცია კარიერის დასრულებას აიძულებდა, რადგან სხვა ქვეყნის სახელით ჭიდაობის უფლებას არ აძლევდნენ. მაშინ ფედერაცია ბრალდებებს უარყოფდა, ხოლო გეგეშიძე ამბობდა, რომ დათუნაშვილმა ქვეყნიდან წასვლა დიდი ხნით ადრე გადაწყვიტა.