ქართული ოცნების თავმჯდომარის, ირაკლი კობახიძის განცხადებით, სასამართლოზე მიხეულ სააკაშვილის სიტყვით გამოსვლაში მხოლოდ ის გაიგო, რომ ექსპრეზიდენტს ყოფილი პირველი ლედის, სანდრა რულოვსის დაჭერა და თავისი თავის გათავისუფლება სურს.

"არ მომისმენია, მაგრამ ვნახე ამონარიდები ინტერნეტში და ერთი, რაც გავიგეთ, არის ის, რომ უნდა სანდრას დაჭერა და მისი გათავისუფლება, ეს არის მთავარი ფაბულა მისი დღევანდელი გამოსვლის", — განაცხადა მან.

მიხეილ სააკაშვილმა სასამართლო პროცესზე თქვა, რომ გახარჯული ხარჯების უმეტესი ნაწილი სანდრა რულოვსისაა და მასთან ერთად საბრალდებო სკამზე სიამოვნებით იჯდებოდა. მისივე განცხადებით, ყოფილმა პირველმა ლედიმ ქვეყნის სამედიცინო სფეროში 100 მილიონი ევროს გრანტები შემოიტანა. გარდა ამისა, ექსპრეზიდენტმა აღნიშნა, რომ სანდრა რულოვსის მეშვეობით, 4-ჯერ ნაკლები ქართველი ქალი კვდება მკერდის კიბოთი.

დღეს, 2 დეკემბერს თბილისის საქალაქო სასამართლოში, ე.წ. პიჯაკების საქმის სასამართლო პროცესი გაიმართა, რომელსაც სააკაშვილიც ესწრებოდა. საქმეს მოსამართლე, ბადრი კოჭლამაზაშვილი განიხილავდა. ექსპრეზიდენტს ბრალად სამსახურებრივი მდგომარეობის გამოყენებით, წინასწარი შეთანხმებით, დიდი ოდენობით სახელმწიფო ქონების გაფლანგვა ედება. საუბარია 9 მილიონ 24 ათას 667 ლარის გაფლანგვაზე. დანაშაული 7-დან 11 წლამდე თავისუფლების აღკვეთას ითვალისწინებს.