მიხეილ სააკაშვილის ადვოკატი, დიმიტრი საძაგლიშვილი აცხადებს, რომ ექსპრეზიდენტის სასამართლო სხდომები პირდაპირ ეთერში უნდა გადაიცემოდეს. ის ამბობს, რომ ამ მოთხოვნას ყველა პროცესზე დააყენებს.

"ყველა პროცესზე ამ მოთხოვნას დავაყენებთ, იმიტომ, რომ ჩვენი უპირველესი ამოცანა არის ამ სხდომების საჯაროობა. საზოგადოებამ უნდა იცოდეს, თუ რა სამარცხვინო ბრალდებები აქვს წარდგენილი მიხეილ სააკაშვილს. ერთ-ერთი გამორჩეული საქმე არის სწორედ პიჯაკების საქმე. სწორედ ამიტომ, ჩვენ ყველაფერს გავაკეთებთ იმისთვის, რომ ეს სხდომა გადაიცემოდეს პირდაპირ ეთერში, ტელევიზიების მეშვეობით", — განაცხადა საძაგლიშვილმა.

რამდენიმე წუთში თბილისის საქალაქო სასამართლოში ე.წ. პიჯაკების საქმის განხილვა დაიწყება. ჯერჯერობით უცნობია, მისცემენ თუ არა ჟურნალისტებს სხდომაზე დასწრების საშუაელბას, ასევე უცნობია, შესაძლებელი იქნება თუ არა სხდომის პირდაპირ ეთერში გადაცემა.

აღსანიშნავია, რომ გუშინ, მიხეილ სააკაშვილის სოციალურ ქსელში გავრცელდა მისი განცხადება იმის შესახებ, რომ მას სურს "ნებისმიერ პოლიტიკური მიმდინარეობის ჟურნალისტი" დაესწროს პროცესს. სააკაშვილის თქმით, ჟურნალისტებს ჰქონდეთ საშუალება საკუთარი თვალებით ნახონ "ისტორიულად სამარცხვინო პროცესი".