კომპანია ტენეს უკვე მთელს საქართველოში შეხვდებით. დაახლოებით 5 წლის განმავლობაში სტარტაპმა მოახერხა და ჯამში 100 000-მდე დამტენი გაყიდა. როგორც მისი დამფუძნებელი, სანდრო ლილუაშვილი გვიყვება, პირველ წელს მხოლოდ 3000 ერთეულის რეალიზაცია მოახერხეს, დროთა განმავლობაში კი გაყიდვებმა მკვეთრად მოიმატა. ეს ძირითადად რამდენიმე ფაქტორის დამსახურებაა, მათ შორის: აქტიური ციფრული მარკეტინგის, ეკოლოგიური მიმართულების ელემენტის დამატების და იმის, რომ პროდუქტი არც მეტი, არც ნაკლები, უკვე საქართველოში მზადდება. ტენეს დღემდე დაახლოებით $100 000-ის ინვესტიცია აქვს მოზიდული, თუმცა ამაზე არ ჩერდებიან და მათი მომხმარებელი სამომავლოდ დამტენის გარდა, უკვე სხვადასხვა ქართულად დაბრენდილ პროდუქტსაც იხილავს. დამწყები ბიზნესებისთვის რჩევები სწორედ სანდროსგან მოვისმინეთ, რომელმაც მისი ხედვები სხვადასხვა მიმართულებით გაგვაცნო:

"პირველ რიგში, ყველაზე დიდ ყურადღებას ციფრულ სამყაროს და ონლაინ სივრცეს მივაქცევდი. დღეს არსებული ტრადიციული საშუალებები, როგორიცაა Facebook ads, Google ads და Instagram უკვე ძვირადღირებული პლატფორმები გახდა. გაიზარდა კონკურენცია, აქტიურობა და შესაბამისად ამ არხებზე რეკლამის განთავსებაც გაძვირდა. ძალიან ეფექტური კამპანია უნდა გქონდეს, რომ Facebook-ზე ბევრ მომხმარებელს მისწვდე. ჩვენი ახალი აღმოჩენა Tiktok-ია, რომელიც ამ მიმართულებით ახლახან გააქტიურდა. ბევრი ამ პლატფორმას სერიოზულად არ უყურებს, თუმცა ეს სოც.ქსელი მარტივი და ეფექტური გამოსაყენებელია. ძალიან დიდი რესურსები დავხარჯეთ Facebook-ზე, Tiktok-მა კი პრაქტიკულად უფასოდ, 5-ჯერ მეტი შედეგი მოგვცა, ამიტომ ჩემი პირველი რჩევა სწორედ ამ პლატფორმის გამოყენება იქნება", — ამბობს სანდრო.

რაც შეეხება პროდუქტს და მომსახურებას, აქ რა უნდა გაითვალისწინონ ბიზნესებმა, რათა მომხმარებლების ყურადღება მიიქციონ?

ტენედან გამომდინარე ვიტყვი, რომ უკეთესი იქნება თუ სრულიად ახალ პროდუქტს ან სერვისს შექმნიან. ჩვენ სათადარიგო ნაწილებს ვყიდულობთ, შემდეგ ერთმანეთთან ვაკავშირებთ და შედეგად, ახალი პროდუქტი იქმნება, რომლის გასაყიდი ღირებულებაც საკმაოდ გაზრდილია. ვურჩევდი ისეთ სექტორში შევიდნენ, სადაც მაღალი მოთხოვნაა. წინააღმდეგ შემთხვევაში, მისი რეკლამა და ცნობადობის გაზრდა ძალიან ძვირი დაუჯდებათ სტარტაპერებს, გაყიდვებმაც შეიძლება დიდ მასშტაბებს ვერ მიაღწიოს. ვფიქრობ, ყველაფრის კომბინაციაა საჭირო: კარგი ფასის, საინტერესო/ცნობადი ნივთის და სწორი სარეკლამო პლატფორმის.

რამდენად დაეხმარა ტენეს განსაკუთრებული სოციალური მისიის შეთავსება? თქვენ გამოყენებული პლასტმასის ბოთლების თავსახურს საწარმოო მასალად ხმარობთ, მათ მომწოდებლებს კი დამტენით აჯილდოებთ. რა შეიცვალა ამ ინიციატივის შემდეგ?

ეკოლოგიაზე ზრუნვა და სოციალური პასუხისმგებლობის აღება ძალიან მომგებიანია. მსგავსი ინიციატივა აუცილებლად დადებითად აისახება დამწყებ ბიზნესზე. ეს იმდენად საინტერესო საკითხებია საზოგადოებისთვის, რომ ამით უამრავი საინფორმაციო საშუალება და არხი ინტერესდება, რაც საბოლოო ჯამში ცნობადობის გაზრდაში ძალიან დაეხმარება სტარტაპს. იმიჯი კი ფაქტობრივად, ყველაფერს ნიშნავს. ეს უფასო რეკლამა იყო ჩვენთვის.

კიდევ ერთი სიახლე, რომელიც ბოლო პერიოდში გააჟღერეთ, 4-დღიან სამუშაო კვირაზე გადასვლა იყო.

ეს იდეა საკუთარი გამოცდილებიდან გამომდინარე მივიღე. ადრე, როდესაც სხვა ორგანიზაციაში ვმუშაობდი, ხშირად შაბათსაც კი მორიგეობა მიწევდა. არადა, ჩემს გეგმას ხშირად, 4 დღეშიც ვასრულებდი. ისეთი შეგრძნება მქონდა, თითქოს ჯარში დავდიოდი და ეს არ მსიამოვნებდა. მინდოდა, რომ იგივე ვალდებულებისგან ჩემი თანამშრომლები გამეთავისუფლებინა და სწორედ ამიტომ გადავდგით ეს ნაბიჯი. ახლა ისინი დღეში 8-ის ნაცვლად 10 საათს მუშაობენ, თუმცა შედეგად, 1 დამატებითი თავისუფალი დღე გამოუჩნდათ. მოტივაცია ძალიან გაიზარდა, პირად ცხოვრებას დიდ დროს უთმობენ, უქმად დროს არ კარგავენ და შედეგიანობა, ფაქტობრივად გაორმაგებულია.

თუ თქვენც გაქვთ იდეა და ფიქრობთ საკუთარი საქმიანობა წამოიწყოთ, მაშინ საქართველოს ბანკის ახალი პროდუქტი დაგაინტერესებთ. დეტალები შეგიძლიათ იხილოთ ამ ბმულზე.