სომხეთის მთავრობამ დღევანდელ, 9 იანვრის სხდომაზე მხარი დაუჭირა კანონპროექტს "სომხეთის რესპუბლიკის ევროკავშირში გაწევრიანების პროცესის დაწყების შესახებ". ინფორმაციას რადიო თავისუფლების სომხური სამსახური ავრცელებს.

მთავრობის წევრებმა დაამტკიცეს შესაბამისი კანონპროექტი, რომელიც სომხეთს ევროკავშირთან ურთიერთობების გაღრმავების გზაზე ახალ ეტაპზე გადაიყვანს.

როგორც საგარეო საქმეთა მინისტრმა, არარატ მირზოიანმა აღნიშნა, ეს ნაბიჯი მიზნად ისახავს სომხეთის ევროპულ სტანდარტებთან დაახლოებას და იმ რეფორმების გაძლიერებას, რომლებიც ქვეყნის დემოკრატიულ განვითარებას ემსახურება.

"სამოქალაქო ინიციატივის სახით, კანონპროექტი სომხეთის ევროკავშირში გაწევრიანების პროცესის დაწყების შესახებ განსახილველად წარედგინა პარლამენტს და ახლა მთავრობამ უნდა გამოხატოს თავისი პოზიცია. ჩვენ ვთავაზობთ დადებითი პოზიციის გამოხატვას რამდენიმე გარემოებიდან გამომდინარე", — აცხადებს მირზოიანი

მოგვიანებით სომხეთის პრემიერმინისტრმა ნიკოლ ფაშინიანმა აღნიშნულთან დაკავშირებით განმარტება გააკეთა:

"დე იურე მთავრობის პოზიცია მდგომარეობს შემდეგში: მთავრობას ამ კანონის მიღებასთან დაკავშირებით საწინააღმდეგო არაფერი აქვს, მაგრამ ასევე მინდა განვმარტო, ეს რას ნიშნავს. ეს არ ნიშნავს სომხეთის ევროკავშირში გაწევრიანებას, ამ სიტყვის პირდაპირი გაგებით, რადგან ამ პუნქტის მიღწევა ან ამ საკითხზე გადაწყვეტილების მიღება არ შეიძლება იყოს კანონის დონეზე ან თუნდაც მთავრობის გადაწყვეტილებაზე. გადაწყვეტილების მიღება შესაძლებელია მხოლოდ რეფერენდუმის გზით, სხვა ვარიანტი არ არსებობს" — ამბობს სომხეთის პრემიერი