ქართული ოცნების აღმასრულებელი მდივანი, მამუკა მდინარაძე ამტკიცებს, რომ მიხეილ სააკაშვილმა "ბევრი საქმე გაუკეთა პუტინსაც და რუსეთაც". ასე გამოეხმაურა ის ექსპრეზიდენტის განცხადებას სასამართლო პროცესზე, რომ მისი სასჯელი და წაყენებული ბრალდებები რუსეთის მიერაა დაგეგმილი.

"ნარატივი უკვე აგერ 9 წელია არის იმგვარი, რომ ერთი, რუსეთი ებრძვის, თითქოს მიხეილ სააკაშვილს, იმიტომ, რომ ასე აწყობთ. ამაზე ჩვენ ბევრი გვაქვს ნასაუბრები — გაღმა შედავების პრინციპია და კომპლექსის მოხსნის მცდელობაა. ამ ადამიანმა ბევრი საქმე გაუკეთა პუტინსაც და რუსეთსაც, მაგრამ ამისი გადაფარვა ხდება გაღმა შედავების პრინციპის პიარის დაგეგმვით", — განაცხადა მამუკა მდინარაძემ.

ის ამბობს, რომ ნაციონალური მოძრაობისთვის "აღარ აქვს მნიშვნელობა ფაქტებს და აღქმებს აქვს" მნიშვნელობა.

დღეს, 29 ნოემბერს მიხეილ სააკაშვილის პროცესი გაიმართა. მოსამართლეთა კოლეგიამ 7 ნოემბრის საქმე განიხილა. ექსპრეზიდენტი საკუთარ სასამართლო სხდომას პირველად დაესწრო და მას სიტყვით გამოსვლის უფლებაც მისცეს. სააკაშვილმა სხვადასხვა პოლიტიკურ თემაზე, მათ შორის, საქართველოში ჩამოსვლასა და შიმშილობაზე, გლდანის ციხეში იძულებით გადაყვანასა და მკურნალობაზე ისაუბრა. ასევე, მიმოიხილა მის მიმართ წაყენებული ბრალდებები. სასამართლო პროცესზე სიტყვით გამოსვლის შემდეგ, სააკაშვილმა დარბაზი დატოვა და სხდომა მის გარეშე გაგრძელდა.

პროცესის მეორე ნაწილში მხარეებმა უკვე კონკრეტულ მტკიცებულებებზე იმსჯელეს. დაცვის მხარემ დააყენა შუამდგომლობა ექსპრეზიდენტისთვის სატელეფონო საუბრების უფლების აღდგენის შესახებ, თუმცა სასამართომ შუამდგომლობა საერთოდ არ განიხილა. მიხეილ სააკაშვილის ადვოკატების შეფასებით, ეს გადაწყვეტილება სასამართლოს მხრიდან მართლმსაჯულების განხორციელებაზე უარის თქმაა.

შემდეგი სხდომა 23 დეკემბერს, 11:00 საათზე ჩაინიშნა.