საქართველოში აშშ-ის ელჩის, კელი დეგნანის განცხადებით, მოხარულია, რომ ექსპრეზიდენტ მიხეილ სააკაშვილს საკუთარ სასამართლო პროცესზე დასწრების შესაძლებლობა აქვს. მისი თქმით, ეს უფლება საქართველოს კონსტიტუციითაა გარანტირებული.

"ძალიან მოხარულები ვართ, რომ მიხეილ სააკაშვილის ჯანმრთელობის მდგომარეობა გაუმჯობესდა და მას აქვს შესაძლებლობა, რომ დაესწროს სასამართლო პროცესს. ძალიან მნიშვნელოვანია პროცესზე დასწრება და ეს არის უფლება, რომელიც გარანტირებულია საქართველოს კონსტიტუციით. ამიტომ, ჩვენ მოვუწოდებდით ამ უფლების განხორციელებისკენ და მოხარულები ვართ, რომ ეს შესაძლებლობა დადგა", — განაცხადა მან.

ელჩმა მიხეილ სააკაშვილის მხარდამჭერებს მოუწოდა, ხელი არ შეუშალონ პროცესს და გამოიყენონ პროტესტის მშვიდობიანი ფორმა.

დღეს სასამართლო 7 ნოემბრის საქმეზე მსჯელობს. ეს პირველი პროცესია, რომელსაც მიხეილ სააკაშვილი ესწრება.

ამ სხდომამდე სააკაშვილს სამჯერ უთხრეს უარი საკუთარ პროცესზე დასწრებაზე, მიზეზად იუსტიციის სამინისტრო მისი ჯანმრთელობის მდგომარეობას და უსაფრთხოებას ასახელებდა. საერთაშორისო პარტნიორები, უფლებადამცველები, ომბუდსმენი, ელჩები და არასამთავრობო ორგანიზაციები აცხადებდნენ, რომ სააკაშვილს არ უნდა შეეზღუდოს საკუთარ სხდომაზე დასწრების უფლება.

სასამართლო პროცესის პარალელურად მოქალაქეები აქციას მართავენ. ადგილზე იყო დაპირისპირება აქციის მონაწილეებსა და სამართალდამცავებს შორის, რა დროსაც რამდენიმე პირი შეუძლოდ გახდა, მათ შორის ოპერატორები. პოლიციამ, საცარაუდოდ, წიწაკის სპრეი გამოიყენა.

აქციაზე დააკავეს გიგი უგულავა და რამდენიმე სხვა აქტივისტი. ამ დროისათვის უცნობია, რამდენი ადამიანი დაკავებული აღმაშენებლის გამზირზე. მთაწმინდის რაიონის პოლიციის ხელმძღვანელის, გოგა მემანიშვილის განცხადებით, აქციის მონაწილეებს ადმინისტრაციული წესით 173-ე მუხლით აკავებენ, რაც პოლიციელის კანონიერი მოთხოვნისადმი დაუმორჩილებლობას გულისხმობს.