ამერიკის სახელმწიფო დეპარტამენტი საქართველოს მთავრობას მოუწოდებს გაითვალისწინოს სახალხო დამცველის ინიციატივით შემქნილი სამედიცინო ექსპერტთა ჯგუფის რეკომენდაციები მიხეილ სააკაშვილთან დაკავშირებით. სახელმწიფო დეპარტამენტის სპიკერის, ნედ პრაისის მოწოდება ეხება ექსპრეზიდენტისთვის სამართლიანი სასამართლოს უფლების უზრუნველყოფასაც, რაც მოიცავს სხდომებზე დასწრების შესაძლებლობას.

"ჩვენ დეტალურად ვაკვირდებით ყოფილი პრეზიდენტის, მიხეილ სააკაშვილის მიმართ მოპყრობას მისი დაკავების დღიდან. მივესალმებით სახალხო დამცველის მონიტორინგს და მის მიერ დამოუკიდებელი სამედიცინო ჯგუფის შექმნას ციხის საავადმყოფოში ბატონი სააკაშვილის ჯანმრთელობის მონიტორინგისთვის. მოვუწოდებთ საქართველოს მთავრობას ბატონ სააკაშვილს სამართლიანად და ღირსეულად მოექცნენ ისევე, როგორც გაითვალისწინონ სახალხო დამცველის რეკომენდაციები მისი მკურნალობის შესახებ.

გარდა ამისა, კატეგორიულად მოვუწოდებთ საქართველოს მთავრობას, უზრუნველყოს ბატონი სააკაშვილის დასწრება მის სასამართლო პროცესებზე საერთაშორისო სამართლის ნორმების შესაბამისად. ბატონ სააკაშვილს აქვს სამართლიანი სასამართლოს უფლება, რომელიც მოიცავს შესაძლებლობას, სურვილის შემთხვევაში პირადად დაესწროს საკუთარ სასამართლო სხდომებს", — ვკითხულობთ აშშ-ს სახელმწიფო დეპარტამენტის განცხადებაში.

მიხეილ სააკაშვილი 50-ე დღეა შიმშილობს. მისი ადვოკატები, ოპოზიცია და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

18 ნოემბერს მიხეილ სააკაშვილის ადვოკატმა, ბექა ბასილაიამ მე-18 დაწესებულებიდან გამოსვლის შემდეგ განაცხადა, რომ სააკაშვილი ოთახიდან გასვლისას "მოსხლეტით წაიქცა და გადააწვინეს საწოლზე". ამასთან, მან თქვა, რომ ხელით გაუხსნეს თვალები. ამის შემდეგ პენიტენციურმა გაავრცელა განცხადება და თქვა, რომ სააკაშვილის მდგომარეობა სტაბილურია. ექსპრეზიდენტის მონახულების შემდეგ, რეანიმატოლოგმა გულიკო ქილიფთარმა განაცხადა, იგი რეანიმაციაშია. მისივე თქმით, პაციენტს ჰქონდა მაღალი წნევა. მოგვიანებით მის სანახავად სხვადასხვა პროფილის ექიმები შევიდნენ. ისინი ამბობენ, რომ სააკაშვილის სასიცოცხლო პარამეტრები გამოსწორებულია, თუმცა მოსალოდნელია სიტუაციის გართულება, რომლის მართვის რესურსი ციხის საავადმყოფოში არ არსებობს.