ლელოს გენერალური მდივანი, ბადრი ჯაფარიძე აცხადებს, პარტია არ შეუერთდება საინიციატივო ჯგუფს, რომლის შექმნის მიზანი ექსპრეზიდენტ მიხეილ სააკაშვილის გათავისუფლებაზე მუშაობაა. ჯაფარიძე ამბობს, რომ ჯგუფის შექმნას ხელს ვერავინ შეუშლის, თუმცა ფიქრობს, რომ ახლა დღის წესრიგში სხვა საკითხები უნდა იდგეს.

"მე ვფიქრობ, რომ ეს მოთხოვნა ამ წუთას არარეალიზებადიც არის. ახლა დღის წესრიგში უნდა იყოს ის, რომ პირველ რიგში, მიეცეს მას საშუალება, დაესწროს სასამართლო პროცესს და მიიღოს მონაწილეობა. დღეს კარლ ჰარცელმაც აღნიშნა, რომ ეს არის სწორედ ევროპული მოთხოვნაც, რომ აუცილებლად განსასჯელი უნდა ესწრებოდეს სასამართლო პროცესს და უნდა ჰქონდეს აქტიური მონაწილეობის უფლება და არგუმენტების მოყვანის საშუალება. ეს აუცილებელია", — განაცხადა ბადრი ჯაფარიძემ პალიტრანიუსის ეთერში.

მიხეილ სააკაშვილის განცხადებით, იმისთვის, რომ გაიფანტოს სახელმწიფო უსაფრთხოების სამსახურის მიერ "ცირკულირებული სპეკულაციები" და ოპოზიციურ პარტიებს მეტი შესაძლებლობა ჰქონდეთ მთავარ საკითხებზე კონცენტრაციის, უმჯობესი იქნება, თუ მისი გათავისუფლების კამპანიაზე საინიციატივო ჯგუფი იმუშავებს.

იდეას გამოეხმაურა დეპუტატი ხათუნა სამნიძე, რომელმაც განაცხადა, რომ #FreeMisha ექსპრეზიდენტის მხარდამჭერების კამპანიაა და არა სხვა პარტიების. მისი თქმით, ამას თავად სააკაშვილიც ხედავს. გირჩი — მეტი თავისუფლების ლიდერმა, ზურაბ ჯაფარიძემ ცალსახად განაცხადა, რომ #FREEMISHA კამპანია მისი მთავარი დღის წესრიგი არაა.