ევროპის საჭადრაკო გუნდურ ჩემპიონატზე საქართველოს ქალთა ნაკრებმა კიდევ ერთ წარმატებას მიაღწია. გუნდმა ზედიზედ მესამედ მოახერხა ვერცხლის მედლის მოპოვება.

აღსანიშნავია ინდივიდუალური მოთამაშეების წარმატებაც: ნანა ძაგნიძემ და ლელა ჯავახიშვილმა მცირე ოქროს მედლების მოპოვება შეძლეს — ძაგნიძემ პირველ, ჯავახიშვილმა კი მეორე დაფაზე.

ნანა ძაგნიძე

ფოტო: საქართველოს ჭადრაკის ფედერაცია

ლელა ჯავახიშვილი

ფოტო: საქართველოს ჭადრაკის ფედერაცია

რიგით 23-ე გუნდური პირველობა სლოვენიის ქალაქ თერმე ჩატეჟში გაიმართა ცხრა ტურად. საბოლოოდ, ჩემპიონატის გამარჯვებული რუსეთის ნაკრები გახდა.

საქართველოს ნაკრებში ნანა ძაგნიძე, ლელა ჯავახიშვილი, მერი არაბიძე, სალომე მელია, სოფიო გვეტაძე იყვნენ, გუნდის კაპიტანი დავით ჯოჯუა, მთავარი მწვრთნელი კი ელიზბარ უბილავაა.