სახალხო დამცველის, ნინო ლომჯარიას აცხადებს, რომ წინა ვიზიტისგან განსხვავებით, ახლა ექსპრეზიდენტ მიხეილ სააკაშვილის სამედიცინო გასინჯვას ბადრაგი აღარ ესწრება. იგი ამ ფაქტს დადებითად აფასებს, თუმცა საუბრობს სხვა პრობლემებზე — პირადი და ჰიგიენური ნივთების არქონაზე. ამასთან, ლომჯარიას თქმით, მალე სასეირნო სივრცის არსებობის საჭიროებაც დადგება.

"რა შენიშვნაც მივეცით წინა ვიზიტის დროს, არის გამოსწორებული. მაგალითად, ბადრაგი აღარ ესწრება მის გასინჯვებს და სამედიცინო შემოწმებას. ასევე, პრობლემა ამწუთას არის ის, რომ გარკვეული პირადი ნივთები და ჰიგიენის ნივთები სჭირდება და ასევე, სასეირნო სივრცის საჭიროება დადგება, როდესაც მას უკვე ფიზიკურად შეეძლება ამის გაკეთება და ეს მოსაგვარებელია და გადავცემთ ამ ინფორმაციას პენიტენციურ სამსახურს, ფანჯარას რაც შეეხება, მოგვარებულია", — აცხადებს ის.

ლომჯარია აღნიშნავს იმასაც, რომ მიხეილ სააკაშვილი სახალხო დამცველის აპარატის და კონსილიუმის წევრების მიმართ ძალიან მადლიერია და მადლიერება გამოთქვა იმაზეც, რომ "დღეს მისი სიცოცხლე საფრთხეში არ არის".

19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.