ევროპული საქართველოს თავმჯდომარის, გიგა ბოკერიას განცხადებით, თუ ხელისუფლება არჩევნების გზით არ შეიცვალა, ეს იქნება საზოგადოების მარცხი. On.ge-სთან საუბრისას ბოკერია ამბობს, რომ უპირატესობის მოპოვება და შედეგად ვადამდელი არჩევნების გზით ხელისუფლების ცვლილება აუცილებელია.

"ამ ქვეყანაში არასოდეს აღარ უნდა გვყავდეს ხელისუფლება, რომელსაც არ აქვს მოქალაქეების მანდატი და დღეს ასეთი გვყავს, სამწუხაროდ ამ რეჟიმის სახით. შემდეგ ჯერზე უნდა შევძლოთ იმხელა უპირატესობა, რომ არჩევნების გზით შევცვალოთ, ვადამდელი არჩევნებით. იმიტომ, რომ არჩევნების გარეშე თუ მოუწევს საზოგადოებას ამის გაკეთება ეს ცუდია და ეს მარცხი იქნება. ვარდების რევოლულუციამ, საბოლოო ჯამში, ისიც მოიტანა საზოგადოების ნებით, რომ ის ხელისუფლება რომელიც ვარდების რევოლუციით მოვიდა ძალაუფლებაში შემდეგ შეიცვალა არჩევნების გზით", — ამბობს ის.

ბოკერია დასძენს, რომ ბევრ ადამიანს, ვინც პოლიტიკურ პროცესებში აქტიურადაა ჩართული, მოთმინება აღარ აქვს, ამიტომ ხელისუფლების არასაარჩევნო პროტესტის ცვლილებას არ გამორიცხავს, თუმცა აქვე აღნიშნავს, რომ ეს სასურველი არ არის.

დღეს ვარდების რევოლუციიდან 18 წელი გავიდა. 2003 წლის 23 ნოემბერს საქართველოს მაშინდელი პრეზიდენტი, ედუარდ შევარდნაძე თანამდებობიდან გადადგა. ერთი დღით ადრე, მიხეილ სააკაშვილი და ნაციონალური მოძრაობის სხვა წევრები ვარდებით ხელში პარლამენტის პლენარულ დარბაზში შეიჭრნენ და შევარდნაძეს გადადგომა მოსთხოვეს. მან დარბაზი დაცვის დახმარებით დატოვა.