ქართული ოცნების დეპუტატის, ანრი ოხანაშვილის განცხადებით, ვარდების რევოლუციიდან საბოლოოდ "დანაშაულებრივ რეჟიმამდე" მივედით. მისი თქმით, ვარდების რევოლუციას ჰქონდა პოლიტიკური მნიშვნელობა. ამასთან მისი შეფასებით, ყველას ჰქონდა დემოკრატიული განვითარების მოლოდინი, თუმცა შედეგად "დანაშაულებრივი რეჟიმი" მივიღეთ.

"ვარდების რევოლუციას ჰქონდა ის პოლიტიკური მნიშვნელობა, რომ ყველას ჰქონდა მოლოდინი ქვეყნის განვითარების, დემოკრატიული განვითარების და რა თქმა უნდა, ეს იყო მოლოდინით აღსავსე ცვლილება და რა თქმა უნდა, ამას ჰქონდა თავისი პოლიტიკური მნიშვნელობა. საბოლოოდ, შედეგობრივად, მივიღეთ ჩვენ დანაშაულებრივი რეჟიმი. ვარდების რევოლუციიდან და ხალხის მოლოდინიდან, რომ ქვეყანა უნდა განვითარებულიყო დემოკრატიული თვალსაზრისით, ამ დაპირებებიდან და ამ საწყისი ნაბიჯებიდან, შედეგად მივედით დანაშაულებრივ რეჟიმამდე", — თქვა ანრი ოხანაშვილმა.

ვარდების რევოლუციიდან 18 წელი გავიდა. 2003 წელს, 2 ნოემბრის არჩევნების შედეგების გამო, მასშტაბური აქციები დაიყო. ცესკოს პირველადი შედეგებს, პარალელური დათვლასა და ეგზიტპოლებს შორის სხვაობამ ოპოზიციის კრიტიკა გამოიწვია, ამას დაერთო დამკვირვებლების შეფასებებიც და პროტესტი 4 ნოემბერს დემონსტრაციაში გადაიზარდა, რასაც ხელისუფლებამ სპეცრაზმის და შინაგანი ჯარის მობილიზებით უპასუხა. თავდაპირველად ოპოზიცია შედეგების გადათვლას ითხოვდა, შემდეგ პრეზიდენტის და შს მინისტრის გადადგომას. პროტესტის უწყვეტობის და მასშტაბების მიუხედავად, ცესკომ საბოლოო შედეგებით გამარჯვებულად სახელისუფლებო პარტია გამოაცხადა, ედუარდ შევარდნაძემ კი პარლამენტის სხდომა ჩანიშნა. 22 ნოემბერს, ახალი პარლამენტის პირველ სხდომაზე, როცა ექსპრეზიდენტი შევარდნაძე მისასალმებელ სიტყვას კითხულობდა, მიხეილ სააკაშვილის მეთაურობით მომიტინგეები სხდომათა დარბაზში შეიჭრნენ. შევარდნაძემ დაცვის თანხლებით დატოვა დარბაზი და შენობა ოპოზიციის მომხრეებმა დაიკავეს. მეორე დღეს, 23 ნოემბერს შევარდნაძე გადადგა და ხელახალი არჩევნები ჩაინიშნა, რომელიც ნაციონალური მოძრაობის გამარჯვებით დასრულდა.