მთავრობის მიერ შექმნილი ექიმთა კონსილიუმი გორის სამხედრო ჰოსპიტალში ჩავიდა. ექიმები ექსპრეზიდენტ მიხეილ სააკაშვილის შიმშილობის შემდგომ მკურნალობის პროცედურებზე იმსჯელებენ.

"ჩვენ დღეს პირველად შევდივართ ამ ჰოსპიტალში. ვიცით, რომ ექიმები უკვე მუშაობენ აქტიურად. შევდივართ, ვნახულობთ პაციენტს და შემდგომ კოლეგებთან ერთად შევთანხმდებით პროცედურებზე. ეს ვიზიტი შეჯერებულია ჯანდაცვის სამინისტროსთან და ჯანდაცვის სამინისტრო ერთ-ერთი ინიციატორია ამის. ანალიზების შესახებ ამ წუთას, ცხადია, ინფორმაცია არ გვაქვს. ამას ყველაფერს ადგილზე ვნახავთ", — განაცხადა ექიმმა, სანდრო ცისკარიძემ ჟურნალისტებთან.

მისივე თქმით, რეფიდინგის პროცესი ძალიან საპასუხისმგებლოა და აქტიურ მონიტორინგს გულისხმობს.

"საფრთხეები ძალიან ბევრია, მათ შორის სხვადასხვა ორგანოთა სისტემის გართულების მხრივ", — აღნიშნა ექიმმა.

გუშინ, 19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.