ექსპრეზიდენტის ექიმის, ნიკოლოზ ყიფშიძის განცხადებით, მიხეილ საკააშვილს გორის სამხედრო ჰოსპიტალში რამდენიმე ტესტი ჩაუტარდა და მდგომარეობა მძიმეა. მისივე თქმით, ხვალ იქნება სამთავრობო კონსილიუმის პირველი შეხვედრა, რომელზეც ადგილობრივ ექიმებთან ერთად განიხილავენ მკურნალობის სქემას.

"ამის გარდა კიდე მორიგეობს რესპუბლიკური საავადმყოფოს ჯგუფი, რეანიმატოლოგები, რომლებიც დღეს დარჩებიან და სულ იქნებიან აქ მორიგეობით", — განაცხადა მან.

როგორც ყიფშიძემ აღნიშნა, ომბუდსმენის შექმნილი ექიმთა საბჭო, სავარაუდოდ, 2 დღეში შეიკრიბება, როცა ამას მათ ლომჯარია აცნობებს. ხოლო ნიკა გვრამიამ აღნიშნა, რომ მესამე ჯგუფი, კონსილიუმი მარიამ ჯიშკარიანის მეთაურობით, მოახდენს კლინიკის ინსპექტირებას. მისივე თქმით, რადგან ახლა შედიან მკურნალობის რთულ ფაზაში, საჭიროა სამივე ჯგუფის მობილიზება.

"რა თქმა უნდა, სრული ნდობით აქაური პერსონალის მიმართ, მაგრამ გარე ექსპერტების მაქსიმალური ჩართულობით, ვისზეც უკვე ვისაუბრეთ, მაქსიმალური ჩარევით, გვინდა, რომ შედგეს ე.წ. რეფიდინგის სწორი პროტოკოლი", — განაცხადა გვარამიამ.

ექსპრეზიდენტის ადვოკატის, ნიკა გვარამიას განცხადებით, გლდანის ციხიდან გორის სამხედრო ჰოსპიტალში მიხეილ სააკაშვილის გადაყვანის პროცედურამ ნორმალურად ჩაიარა, ყოველგვარი ინციდენტების გარეშე. მისივე თქმით, ხვალ იუსტიციის სამინისტროსთან დააზუსტებენ დეტალებს, თუ რა სიხშირით და როგორ შეძლებენ სააკაშვილის მონახულებას.

გუშინ, 19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მოუწოდებდნენ მთავრობას, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე