"ევროპას ისედაც პრობლემა აქვს და ასეთ დროს, როდესაც ევროკომისარი ეძებს საბაბს კონფლიქტისთვის აშშ-სთან, ეს რბილად რომ ვთქვათ, უცნაურია", — ასე შეაფასა საქართველოს პრემიერ-მინისტრმა ირაკლი კობახიძემ, გაფართოების საკითხებში ევროკომისარ მარტა კოსის განცხადება, სადაც ის აღნიშნავდა, რომ ევროკავშირში გაწევრიანების კანდიდატი ქვეყნები ფრთხილად უნდა იყვნენ და არ უნდა აღმოჩნდნენ MAGA-ს წარმომადგენლებზე დამოკიდებული.

მთავრობის მეთაურის თქმით, ევროპელი პოლიტიკოსებისა და ბიუროკრატების ყურადღება არსებული პრობლემების მოგვარებასა და პარტნიორებთან, მათ შორის აშშ-სთან, ურთიერთობების მოწესრიგებაზე უნდა იყოს მიმართული და არა კონფლიქტების გაღვივებაზე.

"ძალიან უცნაურია ასეთი ინიციატივები. ევროპას ისედაც პრობლემა აქვს და ასეთ დროს, როდესაც ევროკომისარი ეძებს საბაბს კონფლიქტისთვის აშშ-სთან, ეს რბილად რომ ვთქვათ, უცნაურია. უმჯობესი იქნებოდა, ევროპელი პოლიტიკოსები და ბიუროკრატები იყვნენ კონცენტრირებულები ევროპის გარშემო არსებული პრობლემის გადაჭრაზე, მათ შორის, აშშ-სთან. სხვა ქვეყნებთან ურთიერთობის დალაგებაზე უნდა იყოს მიმართული მათი მთელი ყურადღება, თუმცა, მათი ყურადღება არის გადატანილი პირიქით, კონფლიქტების გაღვივებისკენ და არა კონფლიქტების დარეგულირებისკენ, რაც ძალიან სამწუხაროა", — განაცხადა ირაკლი კობახიძემ.

შეგახსენებთ, მარტა კოსმა ასევე აღნიშნა, რომ ევროკავშირის გაფართოების პროცესში ისტორიაში პირველად "მოწინააღმდეგეები გამოჩნდნენ". დამაზუსტებელ კითხვაზე, ვინ არიან ევროკავშირის "მოწინააღმდეგეები", კოსმა უპასუხა, რომ მათ შორის რუსეთია.

კოსის თქმით, ევროკავშირი ასევე განიცდის ზეწოლას დასავლეთიდან — MAGA-ს იდეოლოგებისგან, რომლებიც ცდილობენ დაარწმუნონ ევროპელები, რომ ევროპული ცივილიზაცია და ეკონომიკა დაღმასვლას განიცდის და ევროპაში ნამდვილი დემოკრატია არ არსებობს.