ევროპარლამენტი სომხეთიდან საქონლით ვაჭრობის ლიბერალიზაციის დროებითი ზომების შესახებ კანონპროექტს კენჭს 15 სექტემბერს უყრის. აღნიშნული საკითხი ევროპარლამენტის პლენარული სხდომის დღის წესრიგშია, რომელიც 14-17 სექტემბერს სტრასბურგში გაიმართება.

დოკუმენტი ითვალისწინებს ევროკავშირში სომხეთიდან ექსპორტის დაახლოებით 80%-ზე იმპორტის გადასახადების დროებით გაუქმებას. აღსანიშნავია, რომ 2 სექტემბერს, ევროკავშირის საბჭომ ცვლილებების გარეშე დაამტკიცა ევროკომისიის ზემოაღნიშნული წინადადება, რაც გზას უხსნის მის სწრაფ საბოლოო დამტკიცებას ევროპარლამენტის მიერ.

დოკუმენტი ძალაში შევა ევროკავშირის ოფიციალურ ჟურნალში გამოქვეყნებიდან მეორე დღეს და ორი წლის განმავლობაში იმოქმედებს.

ცნობისთვის, ევროკავშირის საბჭომ ხაზგასმით აღნიშნა, რომ რუსეთის მიერ სომხეთზე მოქმედი სავაჭრო შეზღუდვების ფონზე, ევროკავშირის ახალი ზომები მიზნად ისახავს სომხეთის ეკონომიკის მხარდაჭერას, რადგან რუსეთის მიერ დაწესებულმა შეზღუდვებმა გავლენა მოახდინა სომხეთის ექსპორტზე. აღსანიშნავია, რომ რუსეთმა ბოლო რამდენიმე თვის განმავლობაში სომხეთიდან არაერთ სასოფლო-სამეურნეო პროდუქციაზე შეზღუდვა დააწესა. მათ შორის კენკრაზე, სხვადასხვა ხილსა და ბოსტნეულზე, თევზსა და თევზის პროდუქტებზე, მინერალურ წყალსა და ღვინოზე.