ქართული ოცნების აღმასრულებელი მდივანი, მამუკა მდინარაძე აცხადებს, რომ "ელენე ხოშტარიას ფაქტორის" იყო ერთ-ერთი დომინანტი მიხეილ სააკაშვილისთვის გორის ჰოსპიტალში გადაყვანის შეთავაზების შესახებ. მდინარაძე ამბობს, რომ ხოშტარია, ისევე როგორც სხვა მოშიმშილეები მათმა "თანამზრახველებმა" გაწირეს, მაგრამ, ქართულმა ოცნებამ არ გაწირა.

"ელენე ხოშტარიას ფაქტორი ამ გადაწყვეტილებაში, იყო ერთ-ერთი დომინანტური ფაქტორი [...] გამოვიდა ისე, რომ ეს ადამიანი და სხვა მოშიმშილეები ამ სიტუაციურ მოცემულობაში, ამ სიტუაციურმა თანამზრახველებმა გაწირეს და ჩვენ ისინი არ გავწირეთ", — განაცხადა მამუკა მდინარაძემ.

ელენე ხოშტარია შიმშილობას წყვეტს. მისი თქმით, ექსპრეზიდენტ მიხეილ სააკაშვილის გორის სამხედრო ჰოსპიტალში გადაყვანა მისთვის შიმშილობის შეწყვეტის საფუძველია.

ხოშტარიამ შიმშილობა 3 ნოემბერს, მიხეილ სააკაშვილს სამოქალაქო კლინიკაში გადაყვანის მოთხოვნით დაიწყო.

ექსპრეზიდენტ მიხეილ სააკაშვილს გორის ჰოსპიტალში გადაყვანას სთავაზობენ. ამის შესახებ იუსტიციის მინისტრმა, რატი ბრეგაძემ საგანგებო ბრიფინგზე განაცხადა. მისი მტკიცებით, გორის ჰოსპიტალი არის ადგილი, სადაც მიხეილ სააკაშვილის ჯანმრთელობა და უსაფრთხოება მაქსიმალურად იქნება დაცული. ჟურნალისტების კითხვას, როდის და როგორ გადაიყვანენ სააკაშვილს, ბრეგაძე პასუხობს, რომ ეს პროცედურა დაიგეგმება ექიმებთან და უსაფრთხოების თანამშრომლებთან ერთად, როდესაც მის მიერ იქნება მიღებული გადაწყვეტილება, რომ იგი თანახმაა, გადავიდეს გორის სამხედრო ჰოსპიტალში და შეწყვიტოს შიმშილობა.