მას შემდეგ, რაც ჰოგვორტს წლების წინ დავემშვიდობეთ, პოტერჰედების სანუკვარი ოცნება შინ, მაგიურ სამყაროსა და სასახლეში დაბრუნებაა. და, აი, ისიც — პირველი ფილმის გამოშვებიდან 20 წლის იუბილის აღსანიშნავად საგანგებოდ შექმნეს გადაცემა, ჰარი პოტერის მე-20 იუბილე: ჰოგვორტსში დაბრუნება, რომელიც ლეგენდარულ ტრიოს — დენიელ რედკლიფს, რუპერტ გრინტსა და ემა უოტსონს — ასევე ფილმების სერიაში მონაწილე სხვა მსახიობებს გააერთიანებს.

გადაცემის პრემიერა ახალ წელს, 2022 წლის პირველ იანვარს შედგება HBO Max-ზე. მასში "ახალი, საინტერესო ინტერვიუებითა და მსახიობებთან საუბრებით ფილმების შექმნის ჯადოსნურ ისტორიას" მოჰყვებიან.

ჰოგვორტსში დაბრუნებაში ასევე გამოჩნდებიან ჰელენა ბონემ კარტერი (ბელატრის ლესტრეინჯი), რობი კოლტრეინი (ჰაგრიდი), რეიფ ფაინზი (ვოლდემორი), ჯეისონ აიზეკსი (ლუციუს მალფოი), გარი ოლდმანი (სირიუს ბლექი), იმელდა სტონტონი (დოლორეს ამბრიჯი), ტომ ფელტონი (დრაკო მალფოი) და სხვები.

ფოტო: Warner Bros.

"ეს გადაცემა ეძღვნება ყველას, ვისი ცხოვრებაც ამ კულტურულმა ფენომენმა შეცვალა, — აცხადებს Warner Bros. Global Kids-ის პრეზიდენტი, ტომ ეშაიმი, — "დაწყებული მსახიობებითა და მომუშავე პერსონალით, რომელიც საქმეში სულსა და გულს დებდა, დამთავრებული ფანებით, რომლებიც ჯადოსნურ სამყაროს 20 წლის შემდეგაც კი აცოცხლებენ".

ასევე იხილეთ:

მანამდე კი, სანამ მონატრებულ პერსონაჟებს ეკრანზე ისევ ვიხილავდეთ, ნოემბრის ბოლოს TBS და Cartoon Network-ზე ოთხნაწილიანი გადაცემა დაიწყება — ჰარი პოტერი: ჰოგვორტსის კლუბების ტურნირი — რომელსაც ჰელენ მირენი გაუძღვება. ვიქტორინის ფორმატის გადაცემაში პოტერიადის ფანები ჩემპიონის ტიტულის მოსაპოვებლად იბრძოლებენ. პროგრამაში ასევე გამოჩნდებიან მსახიობები ჰარი პოტერიდან.

პრემიერის შემდეგ, ჰოგვორტსში დაბრუნება სხვა ციფრულ სტრიმინგ პლატფორმებზეც გამოჩნდება. მოგვიანებით, 2022 წლის აპრილში ასევე გამოვა ჯადოსნური ცხოველების სერიის მესამე ფილმი, დამბლდორის საიდუმლოებანი.

ნახეთ ჩვენი ყველა მასალა ჰარი პოტერზე.