მიხეილ სააკაშვილის მხარდამჭერი საპროტეტსო აქციაზე კოლონებით მსვლელობა მიმდინარეობს. აქციის მონაწილეები ექსპრეზიდენტის სამოქალაქო მრავალპროფილურ კლინიკაში გადაყვანას ითხოვენ.

ავტოკოლონები სამი ლოკაციიდან: ცესკოს ოფისიდან, რესპუბლიკის მოედნიდან და ენმ-ის ცენტრალური ოფისიდან დაიძრნენ.

მიხეილ სააკაშვილი 47-ე დღეა შიმშილობს. ექსპრეზიდენტი და ადვოკატები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ, ძალის გამოყენებით გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ ექსპრეზიდენტი არ იშიმშილებს, მაგრამ დათქმების გარეშე.