ამერიკელი მუსიკოსი ბობ დილანი ლიტერატურაში ნობელის პრიზის აღებას საბოლოოდ დათანხმდა. BBC-ის ინფორმაციით, ის ჯილდოს ამ შაბათ-კვირას, სტოკჰოლმში მიიღებს.

დილანი პრიზის მფლობელად ოქტომბერში გამოაცხადეს, თუმცა მან შვედეთში ჩასვლა და პრიზის მიღება ვერ შეძლო. ჯილდოს ფულადი ოდენობა 8 მილიონი კრონია (900 ათასი ამერიკული დოლარი).

ნობელის აკადემიის განცხადებით, ისინი 75 წლის მომღერალს შვედეთის დედაქალაქში პირადად შეხვდებიან ჯილდოს გადასაცემად.

ჯილდოს მისაღებად, აუცილებელია პრიზიორმა ლექცია წაიკითხოს, თუმცა დილანი ლექციას აუდიტორიის წინაშე არ წაიკითხავს, ის აკადემიას ლექციის ჩანაწერს გაუგზავნის. სამაგიეროდ, მომღერალი შვედეთში ორ კონცერტს გამართავს.

თუ აკადემია დილანისგან ლექციის ჩანაწერს ივნისისთვის არ მიიღებს, მუსიკოსი მოგებული თანხის გარეშე დარჩება.