გირჩი — მეტი თავისუფლების ლიდერის, ზურაბ ჯაფარიძის განცხადებით, იმედა კლდიაშვილს 7-დღიანი პატიმრობა შეუფარდეს და ანგარიშებს ყადაღა დაადეს. ადვოკატი ამბობს, რომ კლდიაშვილის მიმართ არაპროპორციული ზომა იყო გამოყენებული.

პარტიის წევრების ინფორმაციით, ის აგრძელებს მშრალ შიმშილობას და ამ დრომდე წყალიც არ მიუღია.

ჯაფარიძის განცხადებით, კიდევ ერთ გირჩელს, გიორგი ფუტკარაძეს შეუფარდეს 4-დღიანი პატიმრობა იმის ფონზე, რომ მას აქციაში მონაწილეობა არ მიუღია და იქვე იდგა, როცა დააკავეს. მისივე თქმით, 5-დღიანი პატიმრობა შეუფარდეს თემურ გორგაძეს.

პარტიის ინფორმაციით, ზურა ხომერიკისა და ბადრი გრიგალაშვილის პროცესები გადაიდო, ისევე, როგორც ტორესა მოსის. გირჩის განცხადებით, მიზეზი ის იყო, რომ საპატრულო პოლიციამ ვერ წარადგინა სამხრე კამერების ჩანაწერები.

როგორც პარტიაში ამბობენ, რომა მახარაძე 500 ლარით დააჯარიმეს სუს-ის შენობასთან მუსიკის ჩართვისთვის, ირაკლი კუკანია კი 200 ლარით სუს-ის შესასვლელის ბლოკირებისთვის. ამ და სხვა დაკავებულებზე დამატებითი ინფორმაციისთვის, სასამართლოს პრესსამსახურს დავუკავშირდით. პასუხს მიღებისთანავე შემოგთავაზებთ.

იმედა კლდიაშვილმა გუშინ, 13 ნოემბერს შიმშილობა დაიწყო. ის მიხეილ სააკაშვილის სამოქალაქო კლინიკაში გადაყვანასა და რიგგარეშე არჩევნების დანიშვნას ითხოვს.

კლდიაშვილი ქუთაისში, სუს-ის შენობასთან პროტესტის დროს დააკავეს, როცა გირჩი — მეტი თავისუფლების წევრებმა 6 ქალაქში სახელმწიფო უსაფრთხოების სამსახურის შენობებთან აქციები გამართეს და მანქანებით შესასვლელი ჩახერგეს. შესასვლელის გასათავისუფლებად სამართალდამცავებმა მანქანები ევაკუატორით, შიგნით მყოფი პოლიტიკოსებიანად, ადგილიდან გაიყვანეს.