გირჩი — მეტი თავისუფლების წევრმა, იმედა კლდიაშვილმა შიმშილობა დაიწყო. პარტიის განცხადებით, ის მიხეილ სააკაშვილის სამოქალაქო კლინიკაში გადაყვანასა და რიგგარეშე არჩევნების დანიშვნას ითხოვს.

კლდიაშვილი გუშინ, ქუთაისში, სუს-ის შენობასთან პროტესტის დროს დააკავეს.
შიმშილობის დაწყების გადაწყვეტილება მან დღეს მიიღო.

გირჩი — მეტი თავისუფლების წევრებმა გუშინ 6 ქალაქში სახელმწიფო უსაფრთხოების სამსახურის შენობებთან აქციები გამართეს და მანქანებით შესასვლელი ჩახერგეს. პარტია ითხოვდა სრულად პროპორციულ 2%-იან საარჩევნო სისტემას, რიგგარეშე არჩევნებს გაზაფხულზე და პრეზიდენტი სააკაშვილის გადაყვანას სამოქალაქო კლინიკაში.

შესასვლელის გასათავისუფლებად სამართალდამცავებმა ევაკუატორით შიგნით მყოფი პოლიტიკოსებიანად მანქანები ადგილიდან გაიყვანეს. აქციებზე 10 პირი დააკავეს.