მიხეილ სააკაშვილის ადვოკატის, ბექა ბასილაიას განცხადებით, ის, რასაც ხელისუფლება მესამე პრეზიდენტის წინააღმდეგ აკეთებს, არის არაადამიანური მოპყრობა და პოლიტიკური შურისძიება.

"შუაღამისას გამოსული ბატონი ნიკა ყიფშიძეც საუბრობდა, რომ მიხეილ სააკაშვილის მდგომარეობა ძალიან მძიმეა, ის საუბრობდა წნევაზე. ყოველდღიურად იქნება მსგავსი კრიზისები უკვე, ხელისუფლებამ სიჯიუტეს თავი უნდა დაანებოს და გადადგას ის ნაბიჯები, რისკენაც მოუწოდა ადამიანის უფლებათა ევროპულმა სასამართლომ.

რაც შეეხება ევროპარლამენტარების არშეშვებას, ფაქტია, რომ ხელისუფლებას აქვს შიში, როგორც მიხეილ სააკაშვილის საჯარო გამოჩენის, ასევე, შიში საერთაშორისო წნეხის იმიტომ, რომ რასაც მესამე პრეზიდენტის წინააღმდეგ ისინი აკეთებენ, ეს არის არაადამიანური მოპყრობა, ეს არის წამებასთან გათანაბრებული მოპყრობა, ეს არის პოლიტიკური შურისძიება", — განაცხადა ადვოკატმა TV პირველის ეთერში.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში 8 ნოემბერს გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა — მას შემდეგ, რაც რუსთავის ციხიდან აფრენილი ვერტმფრენი გლდანის ციხის თავზე გამოჩნდა. უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო სააკაშვილი.

ექსპრეზიდენტის ციხეში შეყვანის შემდეგ ადგილზე სპეცრაზმი, წყლის ჭავლის მანქანა და დამატებითი საპოლიციო ძალები შეიყვანეს. გარდა ამისა, ციხეში მიიტანეს კომპიუტერული ტომოგრაფიის აპარატი. მანამდე რამდენიმე დღით ადრე კი უწყება ამტკიცებდა, რომ ციხის კლინიკა საჭირო ტექნიკით აღჭურვილია.

მოთხოვნის მიუხედავად, სააკაშვილთან ღამით არ უშვებდნენ არც ადვოკატებს და არც პირად ექიმს. ადვოკატების თქმით, არასამუშაო საათების მიუხედავად, ვითარება ორდინალური არ იყო და უნდა შეეშვათ.

ნინო ლომჯარიას განცხადებით კი, სააკაშვილს ციხეში უთხრეს, რომ ის სამოქალაქო კლინიკაში უნდა გადაეყვანათ და შესაბამისად, ის აღნიშნულ შეთავაზებას დათანხმდა. მიუხედავად ამისა, სააკაშვილი მაინც ციხის საავადმყოფოში გადაიყვანეს, მოგვიანებით კი გაავრცელეს კადრები, რომლითაც სურთ დაამტკიცონ, რომ ექსპრეზიდენტს #12 დაწესებულება მისი ნების საწინააღმდეგოდ არ დაუტოვებია.

გარდა ამისა, ციხიდან გამოსვლის შემდეგ ომბუდსმენმა თქვა, რომ მე-18 პენიტენციურ დაწესებულებაში ჯერ კიდევ დერეფანში დგას კომპიუტერული ტომოგრაფი, რომელიც იქ მას შემდეგ მიიტანეს, რაც კლინიკაში მიხეილ სააკაშვილი გადაიყვანეს. მისივე თქმით, კლინიკაში არ არის მაგნიტურ რეზონანსული ტომოგრაფიისა (MRT) და კათეტერიზაციის აპარატი.

ფიზიკურ ძალადობაზე საუბრის გარდა, სააკაშვილი წერილში ამბობს, რომ #18 დაწესებულებაში გადასვლისას ციხის ერთ-ერთმა თანამშრომელმა უთხრა: "აჰა, ჩიტო, ხომ ჩაგიგდეთ ხელში".

იუსტიციის მინისტრი ამტკიცებს, რომ რუსთავის ციხიდან გლდანში გადაყვანისას არცერთი პროცედურა და ნორმა არ ყოფილა დარღვეული. მისივე მტკიცებით, სააკაშვილმა ციხეში შეყვანისას თანამშრომლებს სიტყვიერი და ფიზიკური შეურაცხყოფა მიაყენა, რაზეც გენერალურმა ინსპექციამ გამოძიება დაიწყო.

ექსპრეზიდენტი მიხეილ სააკაშვილი უკვე 44-ე დღეა შიმშილობს.