TV პირველის მიერ გავრცელებულ კადრებში ჩანს, რომ გლდანის ციხის საავადმყოფოს ეზოში კომპიუტერული ტომოგრაფიის მოწყობილებები შეიტანეს. ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის N12 პენიტენციური დაწესებულებიდან გლდანის მე-18 დაწესებულების საავადმყოფოში რამდენიმე საათის წინ გადაიყვანეს.

დამატებითი დეტალების გასარკვევად On.ge სპეციალურ პენიტენციურ სამსახურს დაუკავშირდა. მათი პასუხის მიღებისთანავე მასალა განახლდება.

სააკაშვილის ციხის საავადმყოფოში გადაყვანაზე სპეციალურ პენიტენციურ სამსახურში განაცხადეს, რომ გადაწყვეტილება მისი ჯანმრთელობის მდგომარეობის გაუარესების პრევენციის მიზნით და მომატებული საფრთხეებიდან გამომდინარე მიიღეს.

მანამდე რუსთავის ციხესთან ვერტმფრენი გამოჩნდა, რის შემდეგაც გავრცელდა ინფორმაცია, რომ მიხეილ სააკაშვილი ციხიდან სამედიცინო დაწესებულებაში გადაყავდათ.

რუსთავის ციხიდან გამოსვლის შემდეგ სააკაშვილის პირადმა ექიმმა, ნიკოლოზ ყიფშიძემ განაცხადა, რომ ანალიზებზე დაყრდნობით კონსილიუმი ერთად ექსპრეზიდენტის კლინიკაში გადაყვანის აუცილებლობაზე შეთანხმდა.