გირჩი — მეტი თავისუფლების ლიდერი, ზურაბ ჯაფარიძე აცხადებს, რომ სახელმწიფო უსაფრთხოების შენობიდან ევაკუატორით გადაყვანის შემდეგ, ერთი საათის განმავლობაში უცნობ ადგილებში "აკატავებდნენ" და გზის სავალი ნაწილის გადაკეტისთვის 200 ლარით დააჯარიმეს. ჯაფარიძის თქმით, უთხრეს ისიც, რომ საქმე დაუმორჩილებლობის მუხლითაცაა აღძრული.

"მაკატავეს დაახლოებით ერთი საათი. აუ, რაღაც ისეთ ადგილებში ვიყავი, რომელსაც მართლა ვერ ვცნობდი, სად ვიყავი არ ვიცი. საბოლოო ჯამში, აქ მომიყვანეს, ახლა სად ვარ, სიმართლე გითხრათ, ესეც არ ვიცი. დამაჯარიმეს 200 ლარით, სავალი ნაწილის გადაკეტისთვის. [...]

გარდა ამისა, 173-ე მუხლით არისო საქმე აღძრულიო, დაუმორჩილებლობაზეო, ოღონდ, რას არ დავემორჩილე არ ვიცი, იმიტომ, რომ არ გამიგია მათი არანაირი ბრძანება, მანქანაში ვიჯექი. და პლუს, მანქანა არის საჯარიმოზე და მანქანის გადმოყვანაზე იქნება, ალბათ, კიდევ რაღაც ჯარიმა გადასახდელი", — თქვა მან.

ჯაფარიძის თქმით, მიზეზი, რის გამოც არ დააკავეს არის ის, რომ მიუხედავად სტატუსის შეჩერების მოთხოვნისა, სადეპუტატო მანდატი მას ისევ აქვს. მისივე თქმით, მანქანიდან თავადვე გამოვიდა, როცა ერთ-ერთი ტელევიზიის ეთერში ჩართვა დაასრულა.

გირჩი — მეტი თავისუფლების წევრებმა ექვს ქალაქში სახელმწიფო უსაფრთხოების სამსახურის შენობებთან აქციები გამართეს. პარტიის ინფორმაციით, ექვს ქალაქში, თბილისში, ქუთაისში, ბათუმში, რუსთავში, თელავსა და გორში, სუს-ის ოფისების შესასვლელთან მანქანები ჩააყენეს.

პარტია ითხოვს სრულად პროპორციულ 2%-იან საარჩევნო სისტემას, რიგგარეშე არჩევნებს გაზაფხულზე და პრეზიდენტი სააკაშვილის გადაყვანას სამოქალაქო კლინიკაში.

ამავე თემაზე: