95 წლის კაცმა, რომელიც მეორე მსოფლიო ომში მსახურობდა, წელს ვეტერანთა დღე განსაკუთრებულად აღნიშნა, რადგან საშუალო სკოლის ატესტატი მიიღო.

როგორც ამერიკულ მედიაში წერენ, 95 წლის ლუი პიკარიელოსთვის ემოციური მომენტი იყო, როცა 77-წლიანი პაუზის შემდეგ საშუალო სკოლის ატესტატი გადასცეს, რომელიც თავის დროზე ომში მონაწილეობის გამო ვერ მიიღო. 1944 წლის მარტში ის 18 წლის გახდა და რამდენიმე თვე აშორებდა სკოლის დამთავრებას, მაგრამ ჯარში გაიწვიეს და საზღვაო ფლოტს შეუერთდა.

ომის დასრულების შემდეგ ის დაოჯახდა და ახლა სამი შვილი, რვა შვილიშვილი და ხუთი შვილთაშვილი ჰყავს. თუმცა ამ მიღწევების მიუხედავად, ლუი ყოველთვის განიცდიდა, რომ საშუალო სკოლის დიპლომი არ ჰქონდა.

ლუის ოცნების ახდენაში მეგობრები დაეხმარნენ, რომლებიც ადგილობრივ საჯარო სკოლებს დაუკავშირდნენ და ატესტატის მიღების შესაძლებლობაზე ესაუბრნენ. ნედჰემის ერთ-ერთი სკოლა მაშინვე დათანხმდა, რომ ლუისთვის საზღვაო კორპუსის შექმნის 246 წლისთავზე ატესტატი საზეიმოდ გადაეცათ.

"არც კი მჯერა, რომ ეს ხდება. ატესტატის მიღებაში ყველა დამეხმარა და ამას ვაფასებ", — თქვა ლუიმ სიტყვით გამოსვლისას.

რადგან ატესტატი უკვე მის საკუთრებაშია, პიკარიელო აპირებს, რომ ის ჩარჩოში ჩასვას, რათა ყოველდღე უყუროს. ის ხუმრობს, რომ მზად არის, განათლების შემდეგ ეტაპზე გადავიდეს: "ახლა რომელიმე კოლეჯში ჩაბარებაში ვინ დამეხმარება?"