ევროკავშირის ელჩი საქართველოში კარლ ჰარცელი აცხადებს, რომ ექსპრეზიდენტ მიხეილ სააკაშვილის მდგომარეობისა და ჯანმრთელობის უეცარი და შეუქცევადი გაუარესების რისკების გამო ევროკავშირი კვლავ შეშფოთებულია. კარლ ჰარცელმა ინტერპრესნიუსთან, ასევე, განაცხადა, რომ სამედიცინო კონსილიუმის რეკომენდაციები ჯერ სრულად არ შესრულებულა. ელჩი ხელისუფლებას ამ რეკომენდაციების სრულად შესრულების უზრუნველყოფისკენ მოუწოდებს.

ამასთან, ჰარცელი მთავრობას მოუწოდებს სააკაშვილის წინააღმდეგ აღძრულ ყველა საქმეზე გამჭვირვალე და სამართლიანი სასამართლო პროცესის ჩატარება დამოუკიდებელ და მიუკერძოებელ სასამართლოში უზრუნველყოს.

"ევროკავშირი კვლავ შეშფოთებულია ბატონი მიხეილ სააკაშვილის მდგომარეობისა და ჯანმრთელობის უეცარი და შეუქცევადი გაუარესების რისკების გამო. ასევე, დიდ ყურადღებას ვაქცევთ მისი უფლებების სრულ პატივისცემას, როგორც პატიმრის, მათ შორის პირადი ცხოვრების ხელშეუხებლობისა და ღირსების დაცვის საკითხში, ასევე, როგორც ადამიანის, რომელიც სასამართლოს წინაშე წარდგება.

მტკიცედ ვუჭერთ მხარს გასულ თვეში საქართველოს მთავრობის მიერ ბატონი სააკაშვილის ჯანმრთელობის მონიტორინგის მიზნით შექმნილი სამედიცინო კონსილიუმის მუშაობას და იმედს გამოვთქვამთ, რომ ეს კონსილიუმი თავის ღირებულ მუშაობას გააგრძელებს. ასევე, მტკიცედ ვუჭერთ მხარს სახალხო დამცველის მუშაობას, რომელსაც აქვს კონკრეტული კონსტიტუციური როლი — საქართველოში ადამიანის უფლებათა დაცვის ზედამხედველობა", — აცხადებს ელჩი IPN-თან.

ამასთან, ჰარცელი მიესალმება, სახელმწიფო ინსპექტორის აპარატის მიერ ჩატარებულ "ზედმიწევნით შემოწმებას პატიმართა უფლებების საკითხთან დაკავშირებით".

"რაც შეეხება მისი, როგორც პატიმრის უფლებების დაცვას, მხედველობაში ვიღებთ, რომ ბატონი სააკაშვილი გლდანის ციხეში მოხვდა შეურაცხმყოფელ გარემოში, სადაც ემუქრებოდნენ და ის ამტკიცებს, რომ მისი გადაყვანა მოხდა მოტყუებით და ძალადობრივად. ასევე, აღვნიშნავთ, რომ ხელისუფლებამ გამოაქვეყნა ბატონი სააკაშვილის ციხეში ყოფნის ამსახველი ვიდეოები და პირადი, ჯანმრთელობასთან დაკავშირებული მონაცემები. ამიტომ, მოვუწოდებთ საქართველოს ხელისუფლებას, უზრუნველყოს საქართველოს კანონმდებლობისა და საერთაშორისო ვალდებულებების, მათ შორის ადამიანის უფლებათა ევროპული კონვენციის შესაბამისად აღებული ვალდებულებების სრულად შესრულება", — აცხადებს ჰარცელი.

რაც შეეხება მიხეილ სააკაშვილის უფლებებს, როგორც ადამიანის, რომელიც სასამართლოს წინაშე წარდგება, ჰარცელის განცხადებით, მხედველობაში იღებენ, რომ მას თბილისის საქალაქო სასამართლოში სასამართლო პროცესზე პირადად დასწრების უფლება უსაფრთხოებასთან დაკავშირებული მოსაზრებების გამო არ მიეცა.

"ამ კონტექსტში შეგახსენებთ, რომ ადამიანის უფლებათა ევროპული კონვენციის თანახმად, ყველას, ვისაც სისხლის სამართლის დანაშაულში ბრალი ედება, რიგ მინიმალურ უფლებებს შორის, უფლება აქვს თავი დაიცვას პირადად ან მის მიერ არჩეული სამართლებრივი დახმარების საშუალებით. მოვუწოდებთ საქართველოს ხელისუფლებას, ბატონი სააკაშვილის წინააღმდეგ აღძრულ ყველა საქმეზე უზრუნველყოს გამჭვირვალე და სამართლიანი სასამართლო პროცესის ჩატარება დამოუკიდებელ და მიუკერძოებელ სასამართლოში.

მხედველობაში ვიღებთ ერთიანი ნაციონალური მოძრაობის ხელმძღვანელობის კონსტრუქციულ ვალდებულებას არ გამართოს საპროტესტო აქციები ნებისმიერი საავადმყოფოს მახლობლად, სადაც შესაძლოა ბატონი სააკაშვილი გადაიყვანონ, უსაფრთხოების სამსახურების მიერ ადრე დასახელებული პრობლემის გათვალისწინებით, თუ ასეთი გადაყვანა განხორციელდება", — აღნიშნავს ელჩი.

მისივე თქმით, ევროკავშირი ამ სიტუაციას კვლავ დიდი ყურადღებით დააკვირდება და მჭიდრო კავშირშია სხვა ორგანიზაციებთან, მათ შორის ევროპის საბჭოსთან.