სახალხო დამცველის, ნინო ლომჯარიას განცხადებით, დღემდე გრძელდება ექსპრეზიდენტის, მიხეილ სააკაშვილის შეურაცხმყოფელ და ღირსებისშემლახველ პირობებში ყოფნა. როგორც ომბუდსმენი ამბობს, თავადაც შეესწრო ამ ყველაფერს.

"მე-12 დაწესებულებაში რაიმე ოქმი არ არსებობს, რომ ის თანხმობას აცხადებს და ინფორმირებულია სამედიცინო მომსახურების იმ დაწესებულებაში მიღებაზე, შესაბამისად, ეს კიდევ უფრო ამტკიცებს იმ ეჭვებს, რაზეც საუბრობს სააკაშვილი, რომ მას სხვა ინფორმაცია მიაწოდეს. ღირსების შემლახავი იყო, რა თქმა უნდა, ის ფორმები და ის ვითარება, რაც მან გაიარა შესახლების დროს, ის ფორმები, სავარაუდოდ, როგორც მოხდა მისი ძალით შეყვანა.

დღემდე გრძელდება მისი ღირსებისშემლახავ პირობებში ყოფნა — იმის გამო რომ მას მუდმივად უწევს ძალიან შეურაცხმყოფელი და აგრესიული შეძახილების მოსმენა და მე თავად შევესწარი ამ ყველაფერს და ნამდვილად, არა მხოლოდ პატიმრისათვის, ნებისმიერი ადამიანისთვის ეს არის დამთრგუნველი და ძალიან უსიამოვნო", — აცხადებს ის TV პირველის ეთერში.

8 ნოემბერს ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა — მას შემდეგ, რაც რუსთავის ციხიდან აფრენილი ვერტმფრენი გლდანის ციხის თავზე გამოჩნდა. უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო სააკაშვილი.

ექსპრეზიდენტის ციხეში შეყვანის შემდეგ ადგილზე სპეცრაზმი, წყლის ჭავლის მანქანა და დამატებითი საპოლიციო ძალები შეიყვანეს. გარდა ამისა, ციხეში მიიტანეს კომპიუტერული ტომოგრაფიის აპარატი. მანამდე რამდენიმე დღით ადრე კი უწყება ამტკიცებდა, რომ ციხის კლინიკა საჭირო ტექნიკით აღჭურვილია.

მოთხოვნის მიუხედავად, სააკაშვილთან ღამით არ უშვებდნენ არც ადვოკატებს და არც პირად ექიმს. ადვოკატების თქმით, არასამუშაო საათების მიუხედავად, ვითარება ორდინალური არ იყო და უნდა შეეშვათ.

ნინო ლომჯარიას განცხადებით კი, სააკაშვილს ციხეში უთხრეს, რომ ის სამოქალაქო კლინიკაში უნდა გადაეყვანათ და შესაბამისად, ის აღნიშნულ შეთავაზებას დათანხმდა. მიუხედავად ამისა, სააკაშვილი მაინც ციხის საავადმყოფოში გადაიყვანეს, მოგვიანებით კი გაავრცელეს კადრები, რომლითაც სურთ დაამტკიცონ, რომ ექსპრეზიდენტს #12 დაწესებულება მისი ნების საწინააღმდეგოდ არ დაუტოვებია.

გარდა ამისა, ციხიდან გამოსვლის შემდეგ ომბუდსმენმა თქვა, რომ მე-18 პენიტენციურ დაწესებულებაში ჯერ კიდევ დერეფანში დგას კომპიუტერული ტომოგრაფი, რომელიც იქ მას შემდეგ მიიტანეს, რაც კლინიკაში მიხეილ სააკაშვილი გადაიყვანეს. მისივე თქმით, კლინიკაში არ არის მაგნიტურ რეზონანსული ტომოგრაფიისა (MRT) და კათეტერიზაციის აპარატი.

ფიზიკურ ძალადობაზე საუბრის გარდა, სააკაშვილი წერილში ამბობს, რომ #18 დაწესებულებაში გადასვლისას ციხის ერთ-ერთმა თანამშრომელმა უთხრა: "აჰა, ჩიტო, ხომ ჩაგიგდეთ ხელში".

იუსტიციის მინისტრი ამტკიცებს, რომ რუსთავის ციხიდან გლდანში გადაყვანისას არცერთი პროცედურა და ნორმა არ ყოფილა დარღვეული. მისივე მტკიცებით, სააკაშვილმა ციხეში შეყვანისას თანამშრომლებს სიტყვიერი და ფიზიკური შეურაცხყოფა მიაყენა, რაზეც გენერალურმა ინსპექციამ გამოძიება დაიწყო.