ჭყონდიდის ეპარქიაში ისევ ხმაური და დაპირისპირებაა, სასულიერო პირები მონასტერში დაბრუნებას ითხოვენ. ადგილზე დააკავეს რამდენიმე პირი, მათ შორის, ერთი ბერია.

მამა ათინოგენი ამბობს, რომ პოლიცია თავისი ქმედებით ხელს უწყობს ეკლესიას და სახელმწიფოს, რომ საბჭოთა რეჟიმი აღსრულდეს. მისი თქმით, განვითარებული მოვლენები არ არის ქრისტიანობა და ასეთი მეუფის და ეკლესიის მორჩილება არ შეუძლიათ.

დღეს, 7 ნოემბერს ჭყონდიდის მიტროპოლიტმა სტეფანემ სალხინოს მონასტრიდან ბერების გაშვება "ავაზაკთა კრებულისგან გათავისუფლებას" შეადარა. ამ მონასტრის ამბიონიდან მან განაცხადა, რომ ეს ყველასთვის გაფრთხილება უნდა იყოს და დღეიდან ცხოვრება გაგრძელდება "ეკლესიისადმი მორჩილებით და პატრიარქის მოხსენიებით".


19 სექტემბერს მეუფე სტეფანემ მასთან დაპირისპირებული 6 სასულიერო პირი ეკლესიიდან განკვეთა. ბერებმა მონასტრის დატოვებაზე უარი თქვეს და ადგილზე რჩებოდნენ. 3 ნოემბერს მათ საპატრიარქოსგან წერილი მიიღეს, რომ 4 ნოემბრამდე შეეწყვიტათ "საეკლესიო ქონებით უკანონოდ სარგებლობა და განკარგვა". წერილს ხელს პატრიარქის მდივანი, მიქაელ ბოტკოველი აწერდა. ბერებმა ისევ უარი თქვეს ტერიტორიიდან გასვლაზე.

მომდევნო დღეებში ისინი მონასტერში აღარ შეუშვეს, რასაც დაპირისპირება და ხმაური მოყვა. ადგილზე მობილიზებული იყო პოლიციაც.

მეუფე სტეფანე ამბობს, რომ ვისაც სჭირდება თავშესაფარი, მისცემს ცაგერისა და ლენტეხის ეპარქიაში, მაგრამ არა ჭყონდიდში. მამა ათინოგენი კი პასუხად აცხადებს, რომ არ მოსცილდებიან იმ ადგილს, სანამ მონასტერში არ შებრუნდებიან.