ექსპრეზიდენტ მიხეილ სააკაშვილის მამა ნიკოლოზ სააკაშვილი სახელმწიფოს გამოყოფილ ექიმებსა და ალტერნატიულ კომისიას მიმართავს და მოითხოვს, რომ მთავრობას მისი შვილის მულტიფუნქციურ კლინიკაში გადაყვანა აიძულონ. ნიკოლოზ სააკაშვილის განცხადებით, მისი შვილის მდგომარეობა კრიტიკულია.

"მდგომარეობა კრიტიკულია. დრო აღარ ითმენს! მოვითხოვ როგორც ექიმი, როგორც მშობელი და როგორც ქვეყნის პატრიოტი, დღესვე ჩაატარეთ საჯარო პრესკონფერენცია სახელმწიფოს გამოყოფილმა ექიმებმა ალტერნატიულ კომისიასთან ერთად და გააცანით საზოგადოებას პრეზიდენტის ჯანმრთელობის მდგომარეობა და დღესვე აიძულეთ მთავრობა მიშა გადაიყვანონ მულტიფუნქციურ კლინიკაში. გაფრთხილებთ და კოლეგიალურად მოვითხოვ", — წერს ნიკოლოზ სააკაშვილი Facebook-ზე.

სააკაშვილი პირველ ოქტომბერს დააკავეს. ის ბრალს არ აღიარებს, ამიტომ საპატიმროში გადაყვანის შემდეგ შიმშილობა დაიწყო და უკვე 35 დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს.

4 ნოემბერს მიხეილ სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტი ექიმთა კონსილიუმის დაკვირვებებში მონაწილოებას აღარ მიიღებს მანამ, სანამ ალტერნატიულ კომისიას მუშაობის შესაძლებლობა არ ექნება. ამასთანავე, გვარამიამ აღნიშნა, რომ ექსპრეზიდენტს კომუნიკაციისა და მეხსიერების პრობლემები აქვს. მისი თქმით, სააკაშვილს უჭირს სახელების გახსენება და მასთან საუბრისას გამოიკვეთა, რომ მეგობრების სახელები არ ახსოვს.