პატრიარქის მდივნის მიქაელ ბოტკოველის განცხადებით, პატრიარქსა და პრეზიდენტ სალომე ზურაბიშვილს შორის გუშინ გამართული შეხვედრის სასაუბრო თემა სააკაშვილის შეწყალება არ ყოფილა. დეკანოზი რუსთავის ციხეში სააკაშვილთან პატრიარქის წერილის გადასაცემად მივიდა. მისი თქმით, წერილში ილია მეორე სააკაშვილს შიმშილობის შეწყვეტისკენ მოუწოდებს.

"არ ყოფილა ამ საკითხზე საუბარი. ამაზე განმარტებები გაკეთდა. ამაზე საუბარი არ ყოფილა. საუბარი შეეხებოდა კოვიდპანდემიას, რომელიც აწუხებს ქვეყანას და ძალიან შემაშფოთებელია ჩვენი ბოლოდროინდელი სტატისტიკა და შეეხებოდა ქალბატონი პრეზიდენტის გამგზავრებას კვიპროსში", — განაცხადა მიქაელ ბოტკოველმა.

რაც შეეხება კითხვას, მიმართავს თუ არა საპატრიარქო პრეზიდენტს მიხეილს სააკაშვილის შეწყალების თხოვნით, დეკანოზის თქმით, საპატრიარქო ასეთ თხოვნას ვერ გააკეთებს, რადგან ამის უფლება ქვეყნის პრეზიდენტს აქვს.

სააკაშვილი პირველ ოქტომბერს დააკავეს. ის ბრალს არ აღიარებს, ამიტომ საპატიმროში გადაყვანის შემდეგ შიმშილობა დაიწყო და უკვე 35 დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს.