ადვოკატის, ბექა ბასილაიას განცხადებით, ექსპრეზიდენტი მიხეილ სააკაშვილის მდგომარეობა კრიტიკული და რთულია.

"მიხეილ სააკაშვილი უკვე 1 თვეა შიმშილობს, ეს არის ძალიან კრიტიკული და რთული მდგომარეობა, ბუნებრივია, როდესაც 1 თვეა ადამიანი საკვებს არ იღებს, შესაბამისად მის ჯანმრთელობის მდგომარეობასთან დაკავშირებით ყველანი ვართ შეშფოთებულები.

პარამეტრებთან და მაჩვენებლებთან დაკავშირებით ახლა არ შემიძლია კონკრეტული რამე გითხრათ, თუმცა სასამართლოს კონტექსტში 10 ნოემბრის პროცესში ჩანიშვნა ემსახურებოდა ერთადერთ მიზანს, რომ როგორღაც მიხეილ სააკაშვილს არ ჰქონოდა შესაძლებლობა სასამართლოზე პირდაპირი მიმართვის. ამიტომ გაწელეს ამ დრომდე, ამიტომ ახდენდნენ მის იზოლაციას", — აცხადებს ადვოკატი ფორმულას ეთერში.

მისივე თქმით, არ იქნება გასაკვირი, თუ 10 ნოემბრის სასამართლო პროცესი არ ჩატარდება, რადგან ხელისუფლებას მიხეილ სააკაშვილის საზოგადოების წინაშე გამოჩენის ეშინია.

"რაც შეეხება სასამართლოს, ისიც კი არ გაგვიკვირდება, 10 ნოემბრისთვის მიხეილ სააკაშვილს თუ ექნება ფიზიკური შესაძლებლობა, რომ სასამართლოზე გამოცხადდეს, შეიძლება 10 ნოემბრის პროცესიც კი არ ჩაატარონ და ესაც იკადრონ იმიტომ, რომ ხელისუფლების ეს ძრწოლა მიხეილ სააკაშვილის მიმართ და ათ აქვთ შიში მიხეილ სააკაშვილის საზოგადოების წინაშე გამოჩენის", — ამბობს ექსპრეზიდენტის ადვოკატი.

ექსპრეზიდენტი, მიხეილ სააკაშვილი პენიტენციურ დაწესებულებაში უკვე 1 თვეა შიმშილობს. მან შიმშილობა დაკავების დღიდან გამოაცხადა.

29 ოქტომბერს ექსპრეზიდენტმა თქვა, რომ ის უარს ამბობს ექიმთა კონსილიუმთან თანამშრომლობაზე. მისი თქმით, ის აღარ ჩააბარებს ანალიზებსა და არ მიიღებს შიმშილობის შემამსუბუქებელ მკურნალობას.

"ვასრულებ ამ თანამშრობლობას, მადლობელი ვარ კონსილიუმის წევრების და სამწუხაროა, რომ მთავრობამ არ გაითვალისწინა მათი მთავარი რეკომენდაცია", — აცხადებს ის.

მანამდე, 28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

ექსპრეზიდენტის სამოქალაქო კლინიკაში გადაყვანის შესახებ ხელისუფლებას მოუწოდებენ პოლიტიკური პარტიები, ორგანიზაციები, სამედიცინო მუშაკები.