ამ წუთებში იუსტიციის უმაღლეს სკოლაში მოსამართლეთა კონფერენცია მიმდინარეობს. კონფერენციის დღის წესრიგში ერთ-ერთ საკითხად იუსტიციის უმაღლესი საბჭოს მოსამართლე წევრის/წევრების არჩევაა განსაზღვრული. უცნობია, საბჭოს რომელი წევრის ჩანაცვლებას აპირებენ კონფერენციაზე, რადგან არც ერთ მოქმედ წევრს უფლებამოსილების ვადა არ ამოწურვია, ასევე, არ გასაჯაროებულა ინფორმაცია რომელიმე მათგანისთვის უფლებამოსილების შეწყვეტის შესახებ.

On.ge დაუკავშირდა იუსტიციის უმაღლესი საბჭოს პრესსამსახურს, სადაც გვითხრეს, რომ კონფერენციაზე ამ საკითხის განხილვა ჯერ არ დაწყებულა და ამ ეტაპზე ვერ მოგვაწვდიან ინფორმაციას ვერც საბჭოს წევრობის კანდიდატებზე და ვერც იმაზე, ვისი ჩანაცვლება იგეგმება.

სოციალური სამართლიანობის ცენტრში აცხადებენ, რომ მაშინ, როცა საზოგადოების დიდი ნაწილის ყურადღება თვითმმართველობის არჩევნებზეა გადატანილი, ე.წ. სასამართლო კლანი ცდილობს ნაჩქარევად აირჩიოს ახალი მოსამართლე წევრი, რითაც სასამართლო სისტემაში საკუთარ ძალაუფლებას გაიმტკიცებს.

"იმ ფონზე, როდესაც საბჭოს შემადგენლობა და წევრების შერჩევის პროცედურა გადახედვას საჭიროებს, ასევე არსებობს არამოსამართლე წევრის 5 ვაკანტური პოზიცია, სასამართლო სისტემაში არსებული გავლენიანი ჯგუფისთვის გარანტირებული ხმის ფლობა განსაკუთრებულ მნიშვნელობას იძენს.

ასეთ ვითარებაში მოსამართლეთა კონფერენციის დანიშვნა ქმნის საფუძვლიან ეჭვს, რომ სასამართლო სისტემაში არსებული გავლენიანი ჯგუფი ქვეყანაში არსებული მწვავე პოლიტიკური კრიზისის ფონზე, როდესაც საზოგადოებრივი ინტერესი სასამართლო სისტემიდან სხვა საკითხებზეა მიმართული, ძალაუფლების განმტკიცების სურვილით ცდილობს ნაჩქარევად, რეფორმების არარსებობის პირობებში მიიღოს ეს მნიშვნელოვანი და სტრატეგიული გადაწყვეტილება", — აცხადებენ ორგანიზაციაში.

იუსტიციის უმაღლესი საბჭოს ახალი წევრის არჩევის შესახებ ინფორმაციის გასაჯაროვებისთანავე, On.ge მოგაწვდით დამატებით დეტალებს.