სპეციალური პენიტენციური სამსახურის განცხადებით, სიმართლეს არ შეესაბამება გავრცელებული ინფორმაცია, თითქოს მე-12 დაწესებულების ტერიტორიაზე განსაკუთრებული მობილიზებაა და სპეცრაზმი და პოლიციის კოლონების შეჰყავთ.

"სპეციალურმა პენიტენციურმა სამსახურმა პირველ ოქტომბერს შინაგან საქმეთა სამინისტროს მიმართა უსაფრთხოების ნორმების მაქსიმალურად დაცვის მიზნით გამოეყო დამატებითი ძალები, რომელიც განთავსებული არის სწორედ ინფორმაციულ-ტექნიკური უსაფრთხოების მთავარი სამმართველოს ბაზაზე.

გავრცელებულ კადრებშიც სწორედ შინაგან საქმეთა სამინისტროს დამატებითი ძალების როტაციის პროცესია ასახული და რაიმე განსაკუთრებული მობილიზება N12 დაწესებულების მიმდებარედ არ ხდება", — წერია უწყების განცხადებაში.

დღეს, 30 ოქტომბერს სხვადასხვა მედიით გავრცელდა ინფორმაცია, რომ რუსთავის მე-12 დაწესებულებაში სპეცრაზმის მობილიზება ხდებოდა.

რუსთავის 12-ე დაწესებულებაში ყოფილი პრეზიდენტი, მიხეილ სააკაშვილი იმყოფება. ის პირველ ოქტომბერს დააკავეს და უკვე 30 დღეა შიმშილობს.