მიხეილ სააკაშვილის პირადი ექიმის, ეკატერინე მხეიძის განცხადებით, ექსპრეზიდენტის მდგომარეობა შიმშილობის ფონზე შეიძლება ისე გართულდეს, რომ რეანომობილმა ვერც მიუსწროს.

"მისი ჯანმრთელობის მდგომარეობა, ის, რაც მას ჰქონდა, თანდაყოლილი დაავადებები, რომელიც დაავადებად შეიძლება არც ჩაითვალოს, როდესაც ადამიანი ნორმალურად ცხოვრობს და იკვებება, ასევე, შემდგომ თანდაყოლილი პათოლოგიები, რომელიც ასევე, ნორმალური მკურნალობისა და ნორმალური პირობების შემთხვევაში არ წარმოადგენს სასიცოცხლო საშიშროებას, ეს ყველაფერი არის საგანგაშო იმ შეთხვევაში, თუ ბატონი მიხეილი რა მდგომარეობაშიც ახლა იმყოფება, 25-26 დღის განმავლობაში შიმშილობს და მხოლოდ სითხეებს იღებს, ამ შემთხვევაში არის ეს ძალიან დიდი რისკი, შეიძლება, უბრალოდ, ღამე, როდესაც მარტოა საკანში, ისე ცუდად გახდეს, ისეთი დამძიმებული ფორმით განუვითარდეს ამ ფონის, შიმშილობის, გამო, რომ ვერც მიუსწრებს ადამიანი, რომ რეანომობილით სადღაც გადაიყვანოს", — აცხადებს მხეიძე.

ექიმი მიმართავს ციხის ადმინისტრაციას, სახელმწიფო სტრუქტურებს, ჯანდაცვის სამინისტროს, რომ მიიღოს ეს როგორც უკიდურესი საგანგაშო გაფრთხილება.

"ამიტომ მე კატეგორიულად მოვითხოვ საგანგაშო მდგომარეობაა, ვაფრთხილებ ციხის ადმინისტრაციას, სახელმწიფო სტრუქტურებს, ჯანდაცვის სამინისტროს, მიიღეთ ეს როგორც უკიდურესი საგანგაშო გაფრთხილება", — ამბობს ის.

მიხეილ სააკაშვილი პირველ ოქტობერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 26 დღეა შიმშილობს.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

მისი პირადი ექიმის, ნიკოლოზ ყიფშიძის განცხადებით, სააკაშვილი გლდანის ციხეში მკურნალობის კატეგორიულად წინააღმდეგია. ექიმის ცნობით, კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.

პრემიერმინისტრი ირაკლი ღარიბაშვილი კი ამტკიცებს, რომ სააკაშვილს აქვს "ილუზიები", თითქოს კერძო კლინიკაში გადაყვანის შემთხვევაში, 30 ოქტომბერს მისი მხარდამჭერები მობილიზდებიან და გაათავისუფლებენ. რაც შეეხება სააკაშვილის კერძო საავადმყოფოში გადაყვანას, ღარიბაშვილი აცხადებს, რომ ციხის საავადმყოფოში ყველა პირობა არის შექმნილი და ეს გადაწყვეტილება "არ გადაიხედება".