პრემიერმინისტრი ირაკლი ღარიბაშვილის ხნის, რატომ დაინიშნა მისი აზრით მეორე ტური ქუთაისში. მას შემდეგ, რაც ქართული ოცნების კანდიდატი, იოსებ ხახალეიშვილი აქო, ნაციონალურ მოძრაობის კანდიდატ ხატია დეკანოიძეზე კი განაცხადა, რომ მას ქუთაისთან არავითარი კავშირი არ აქვს, მეორე ტურის დანიშვნის მიზეზი "ახსნა".

"ვინ არის მისი ოპონენტი?! ქალბატონი ხატია დეკანოიძე; ქალბატონი, რომელსაც საერთოდ წარმოდგენა არ აქვს, რა ხდება ქუთაისში, გავლით არის ნამყოფი ქუთაისში და არავითარი კავშირი, ბმა ქუთაისთან, ქუთაისელებთან არ გააჩნია. გასაგებია შედეგი, რაც მიიღო, ეს იყო "სააკაშვილის ეფექტი", დროებითი ეფექტი", — განაცხადა ირაკლი ღარიბაშვილმა.

ჟურნალისტის შენიშვნის შემდეგ, რომ ეს იყო "სააკაშვილის ეფექტი" თუ სხვა მიზეზი, ფაქტია, რომ ქუთაისში მეორე ტური გაიმართება, ღარიბაშვილმა სცადა, უფრო მკაფიოდ განემარტა ამის მიზეზი, თუმცა ამჯერად გიორგი გახარია "დაადანაშაულა".

"ახლა რაც შეეხება მიზეზს, ე.ი. მიზეზი არის — რა თქმა უნდა, ჩვენ ეს არაერთხელ გვითქვამს — რომ არ ყოფილიყო მოღალატე გახარიას ფაქტორი, რა თქმა უნდა, სრული თავდაჯერებულობით მინდა, ვთქვა, რომ პირველივე ტურში გაიმარჯვებდა ჩვენი კანდიდატი. ქუთაისის საკრებულოში გვაქვს სრული უმრავლესობა, ეს ერთი. მეორე, მეორე ტურები სადაც მივიღეთ, მივიღეთ გახარიას გამო და არა სააკაშვილის გამო, ეს არის ფაქტი", — განაცხადა ირაკლი ღარიბაშვილმა.

30 ოქტომბერს ქუთაისში, ისევე როგორც სხვა 19 ქალაქსა თუ მუნიციპალიტეტში, თვითმმართველობის არჩევნების მეორე ტური გაიმართება, სადაც ერთმანეთს იოსებ ხახალეიშვილი და ხატია დეკანოიძე დაუპირისპირდებიან. პირველ ტურში ხმები ასე გადანაწილდა:

  • ხატია დეკანოიძე — 43,34%;
  • იოსებ ხახალეიშვილი — 41,45%;
  • გიორგი გოგუაძე (გახარიას პარტია) — 8,72%.

გაიგე მეტი: