ნაციონალური მოძრაობის ქუთაისის მერობის კანდიდატის, ხატია დეკანოიძის თქმით, მზად არის ითანამშრომლოს გიორგი გოგუაძესთან — ექსპრემიერ გიორგი გახარიას პარტიის მერობის კანდიდატთან. დეკანოიძე გოგუაძეს ჭკვიან და მოტივირებულ ახალგაზრდად ახასიათებს და აღნიშნავს, რომ ეს არჩევნების პირველ ტურამდეც უთქვამს.

"თუ გამოხატავს ინტერესს, რა თქმა უნდა, ყოველ შემთხვევაში, მე მზად ვარ ყველას დაველაპარაკო როგორც გითხარით ქალაქის მმართველობაში, მინუს ქართული ოცნება, ყველა უნდა იყოს ჩართული [...]

ძალიან ჭკვიანი, მოტივირებული ახალგაზრდაა. ადგილობრივი, ქუთაისელი, კარგი ადამიანი და გულწრფელად, სიმპატიურია პოლიტიკურად. ახლა არ ვამბობ მარტო, მეორე ტურის წინ. პირიქით, მე ეს რამდენჯერმე აღვნიშნე. შესაბამისად, ასეთი ადამიანები თუ იქნებიან ქალაქის მმართველობაში ჩართულები, მე პოზიტიური დამოკიდებულების მეტი არაფერი სათქმელი არ მექნება. გულწრფელად, მიუხედავად იმისა, რომ ჩემი დამოკიდებულება ბატონი გახარიას მიმართ იცით და ძალიან დიდი ხანია უკვე ცნობილია. ", — თქვა დეკანოიძემ ფორმულას ეთერში.

დეკანოიძე ამბობს, რომ მასთან თანამშრომლობის შესახებ გადაწყვეტილება გახარიას პარტიაშიც უნდა მიიღონ. ამასთან, 7 ოქტომბერს გიორგი გახარიამ თქვა, რომ არცერთ მუნიციპალიტეტის დონეზე ქართულ ოცნებასთან და ნაციონალურ მოძრაობასთან კოალიციის შექმნას არ აპირებენ.

ქუთაისში თვითმმართველობის მეორე ტურში გადავიდა ნაციონალური მოძრაობის კანდიდატი, ხატია დეკანოიძე და ქართული ოცნების კანდიდატი, იოსებ ხახალეიშვილი. ხმები ასე გადანაწილდა:

  • ხატია დეკანოიძე — 43,34%;
  • იოსებ ხახალეიშვილი — 41,45%.

რაც შეეხება გიორგი გახარიას პარტიის მერობის კანდიდატს, გიორგი გოგუაძეს ის მესამე ადგილზე გავიდა და ხმების 8,72% აიღო.