პრემიერმინისტრ ირაკლი ღარიბაშვილის განცხადებით, გუშინ თანამდებობიდან გადამდგარმა სამეგრელო-ზემო სვანეთის სასაზღვრო პოლიციის თანამშრომელმა ვერ შეიცვალა "ფერი და ზნე" და დატოვა თანამდებობა. ღარიბაშვილმა აღნიშნა, რომ გადამგარი ძალოვანი ბაჩო ახალიას უახლოესი მეგობარია.

"ერთი პოლიციელი, რომელიც არის ახალაიას უახლოესი მეგობარი და ეს ცალკე პრობლემაა, რომ ამ ადამიანმა ვერ დააფასა, ვერ გამოსწორდა, ვერ შეიცვალა ფერი და ზნე და დატოვა, რაღაც ვითომ იმიტომ, რომ ერთ-ერთმა უბიძგა, რომ დაეტოვებინა. მე ერთი რამ მინდა ვთქვა, მე სრულ პატივისცემას ვუდასტურებ და სრულ თანადგომას და გვერდში დგომას ყველა პოლიციელს, ყველა ღირსეულ ოფიცერს, უსაფრთხოების თანამშრომელს, ყველა ჯარისკაცს", — აცხადებს პრემიერმინისტრი.

ღარიბაშვილის თქმით, რევაზ ლაზიშვილი, რომელმაც თანამთებობა დატოვა, პოლიტიკურად ანგაჟირებული პიროვნებაა და მას გადადგომა უბრძანეს. პრემიერმინისტრი ფიქრობს, რომ აღნიშნულ ამბავში არაფერი "სენსაციური არ არის".

"პოლიციელმა და ოფიცერმა პირველ რიგში საკუთარ მუნდირს უნდა სცეს პატივი და საკუთარ ფორმას უნდა სცეს პატივი. ვისაც უნდა პარტიულ მუშაობაში მონაწილეობის მიღება და პოლიტიკაში მონაწილეობის მიღება, ეს მათი არჩევანია. მე ეს ყოველთვის მითქვამს ღიად, რომ უნდა აირჩიონ მათ გზა და ასეც მოხდა გუშინ, აქ არავითარი სენსაციური არ არის. ერთმა პოლიციელმა, პოლიციელმა კიარა, რეალურად, პოლიტიკურად ანგაჟირებული კაცი ვერ მოერია საკუთარ თავს და დაემორჩილა მათ ბრძანებას. მორჩა, სხვა არაფერი", — განაცხადა ღარიბაშვილმა.

რაც შეეხება ყოფილი ძალოვნის დაკავებას, ღარიბაშვილი ამბობს, რომ თუ პოლიციამ შესაძლო კანონდარღვევაზე ინფორმაცია მიიღო და რეაგირება მოახდინა, "ეს აბსოლუტურად ნორმალურია". მისივე თქმით, ეს პოლიციის პირდაპირი მოვალეობაა და აქ "არავითარი გასარკვევი და გამოსაძიებელი არაფერი არ არის, გარდა იმისა, რომ ყველაფერი უნდა იყოს გამჭვირვალე და ღია".

21 ოქტომბერს სამეგრელო-ზემო სვანეთის სასაზღვრო პოლიციის თანამშრომელმა, რევაზ ლაზიშვილმა ზუგდიდში ყოფილი ძალოვნების სახლების ჩხრეკის და დაკავების პროსტესტის ნიშნად თანამდებობა დატოვა. მისი თქმით, არ შეეძლო კაბინეტიდან ეყურებინა გმირი პოლიციელების მიმართ ჩატარებული ქმედებებისთვის და ეს გადაწყვეტილებაც ამიტომ მიიღო.