ჯანდაცვის მინისტრის მოადგილე აცრების ტემპის შენელების ერთ-ერთ მიზეზად ვაქცინის გვიან შემოტანისა და არასაკმარისი საინფორმაციო კამპანიის გამო ხელისუფლების კრიტიკას ასახელებს. თამარ გაბუნიას განცხადებით, ვაქცინაციის პროცესში ვაქცინის სიკეთეებზე ინფორმაციას სჭარბობდა პოლიტიკურად მოტივირებული მესიჯები, როგორებიცაა — "ჩაიშალა", "ჩაფლავდა", "გაფუჭდა", "დაგვიანდა". მისი თქმით, პირს, რომელმაც ვაქცინაციის შესახებ უნდა მიიღოს გადაწყვეტილება, "საინფორმაციო უზრუნველყოფა სჭირდება ნებისმიერ შემთხვევაში და ჩვენი საინფორმაციო კამპანია "უფრო მეტად ნეგატიურ მესიჯებზე იყო დამყარებული, ვიდრე პოზიტიურ მესიჯებზე".

"ნაცვლად იმისა, რომ ჩვენ სტაბილურად და თანმიმდევრულად ვაზიაროთ ინფორმაცია იმის შესახებ, თუ რამდენად ეფექტურია ვაქცინა და რა სიკეთის მომტანია და ნამდვილად არის და დღითი დღე უფრო მეტი და მეტი მტკიცებულება ჩნდება იმის შესახებ, რომ ეს ნამდვილად ასეა, ხშირად ამ ტიპის კამპანიას გადაფარავს გარკვეული პოლიტიკურად მოტივირებული მესიჯები — ჩაიშალა, ჩაფლავდა, გაფუჭდა, დაგვიანდა, რაც, რა თქმა უნდა, ძალიან დამაბნეველია ისედაც მერყეობის ფაზაში მყოფი მოქალაქისთვის. თუ ჩვენ მოვახერხებთ იმას, რომ რაღაცნაირად ერთიან, დადებით, პოზიტიურ მესიჯებს შევინარჩუნებთ ვაქცინაციასთან მიმართებაში, მიუხედავად იმისა, ვის წარმოვადგენთ, რა ინტერესი გვაქვს სხვა არენაზე... ვაქცინაციასთან მიმართებაში ყველა ინტერესის გაერთიანება დღეს არის კრიტიკული", — თქვა გაბუნიამ.

მინისტრის მოადგილეს ვაქცინაციის ტემპის შენელების მიზეზებზე პარლამენტში ჰკითხეს. მან გამოყო ფიზიკური ხელმისაწვდომობის პრობლემაც, თუმცა თქვა, რომ ეს შედარებით მარტივად მოგვარებადია.

"ერთ-ერთი კრიტიკული ფაქტორი არის ის, განსაკუთრებით რაიონებში, რამდენად აქტიურად იმუშავა ადგილობრივმა თვითმმართველობამ, ტრანსპორტირების უზრუნველყოფა შეძლო თუ არა, მოსახლეობას რამდენად ჰქონდა მხარდაჭერა თავისივე სოფლის თემისგან, იქნებოდა ეს მერი, გუბერნატორი, თუ სხვა, რომელიც დაეხმარებოდა ტრანსპორტის ორგანიზებაში, პირადად დაელაპარაკა. მე ვფიქრობ, რომ ჩვენთვის დღეს ერთ-ერთი გამოსავალი იმისთვის, რომ ვაქცინაციის ტემპი გააქტიურდეს, იქნება უშუალოს სოფლის დონეზე მოსახლეობასთან მუშაობა", — თქვა გაბუნიამ.

გარდა ამისა, მინისტრის მოადგილემ ისაუბრა ე.წ. მწვანე საშვის მექანიზმზე და აღნიშნა, რომ ამაზე მსჯელობა მიმდინარეობს.

"რა თქმა უნდა, ადამიანის ფუნდამენტური უფლებაა, გადაწყვეტილება მიიღოს იმის შესახებ, რა ინტერვენციას ჩაიტარებს დაა ვაქცინას გაიკეთებს თუ არა, თუმცა, მეორე მხრივ, ასევე ადამიანის ფუნდამენტური უფლებაა ის, რომ როდესაც მიდის სამუშაო გარემოში, ბიზნეს გარემოში, სოციალურ ღონისძიებაზე, დაცული იყოს ეპიდემიური რისკებისგან. აქ არჩევანის საფუძველზეა ვაქცინაცია ან PCR ტესტირება დაბალანსებულია ამ შემთხვევაში უფლებრივი საკითხები", — თქვა მან.

ამასთან, თამარ გაბუნიამ აღნიშნა, რომ ხელისუფლება აქტიურად მუშაობს საერთაშორისო ორგანიზაციებთან, რომლებიც წუხან და გვეხმარებიან. მისი თქმით, მსჯელობენ მექანიზმზე, როგორ შეიძლება იყოს ყველაზე ეფექტური მწვანე საშვის ამოქმედება როგორც უფლებრივ, ისე აღსრულების ჭრილში.

მინისტრის მოადგილემ თქვა ისიც, რომ მოსახლეობის დაახლოებით 80% უნდა იყოს აცრილი, რათა ქვეყანამ შეზღუდვების გარეშე სტაბილურად შეძლოს ფუნქციონირება.

18 ოქტომბრის მონაცემებით, ქვეყანაში ჩატარებული აცრების რაოდენობაა — 1 899 938, ხოლო სრულად ვაქცინირებულია 892 410 ადამიანი.

დღეს საქართველოში კორონავირუსის 2 479 ახალი შემთხვევა დადასტურდა, გამოჯანმრთელდა — 2 374, ხოლო გარდაიცვალა 42 ადამიანი.